საუდის არაბეთის დედაქალაქ ერ-რიადში, მეფე ხალიდის სახელობის საერთაშორისო აეროპორტზე ჰუსიტების მიერ განხორციელებული თავდასხმის შედეგად სულ მცირე 12 ადამიანი დაიღუპა და 309 დაშავდა.
საუდის არაბეთის სამოქალაქო ავიაციის წარმომადგენლებმა დაადასტურეს, რომ დაღუპულთა შორის საუდის არაბეთის ოთხი, ბანგლადეშის ორი და აშშ-ის, ეგვიპტის, იორდანიის, სირიის, პალესტინისა და სუდანის თითო მოქალაქეა.
სამედიცინო ბრიგადებმა დაშავებული 309 ადამიანი დედაქალაქის საავადმყოფოებში გადაიყვანეს. გავრცელებული ინფორმაციით, ზოგიერთი დაშავებულის მდგომარეობა მძიმეა.
თავდასხმის შედეგად აეროპორტის ტერმინალის ინფრასტრუქტურას სერიოზული ზიანი მიადგა; გავრცელებული განცხადების თანახმად, ტექნიკური ჯგუფები ზარალის მასშტაბის დასადგენად შემოწმებას განაგრძობენ.
ფრენებში დიდი შეფერხება წარმოიშვა
აეროპორტის ადმინისტრაციამ თავდასხმისთანავე, ზარალის შეფასებისა და ობიექტების უსაფრთხოების გადამოწმების მიზნით, დროებით შეაჩერა ყველა ფრენა.
ამ გადაწყვეტილებამ რეგიონულ საჰაერო მიმოსვლაში სერიოზული შეფერხებები გამოიწვია, ხოლო მგზავრებს აეროპორტში გამგზავრებამდე ავიაკომპანიებთან დაკავშირება ურჩიეს.
„ქუვეითის ავიახაზებმა“, აეროპორტის საგანგებო დახურვის მიზეზით, შაბათს ერ-რიადის მიმართულებით და პირიქით დაგეგმილი ყველა რეისი გააუქმა.
თავდასხმა განხორციელდა რეგიონში დაძაბულობის გამწვავების ფონზე, მას შემდეგ, რაც ბოლო დღეებში ჰუსიტებმა საუდის არაბეთის აეროპორტებსა და კრიტიკული ინფრასტრუქტურის ობიექტებზე ტრანსსასაზღვრო სარაკეტო და უპილოტო საფრენი აპარატებით თავდასხმების სერია განახორციელეს.
