კრემლის პრესსპიკერმა, დიმიტრი პესკოვმა განაცხადა, რომ უკრაინულ მხარეს კრიზისის მშვიდობიანი მოგვარების სურვილი არ გააჩნია და აღნიშნა: „რუსეთი ღიაა თავისი მიზნების მიღწევისათვის სამშვიდობო მოლაპარაკებების გზით“.

პესკოვმა მოსკოვში ჟურნალისტებთან დღის წესრიგში არსებულ საკითხებზე ისაუბრა.

მისი თქმით, რუსეთი უკრაინის კრიზისის მშვიდობიანი გადაჭრის მომხრეა. „რუსეთი ღიაა თავისი მიზნების მისაღწევად სამშვიდობო მოლაპარაკებების გზით. ამისთვის მზად არის რუსეთის პრეზიდენტი ვლადიმერ პუტინიც“, - განაცხადა პესკოვმა.

პესკოვმა აღნიშნა, რომ უკრაინას არ აქვს განზრახული კრიზისის მშვიდობიანი მოგვარების პროცესის გაგრძელება: „იმ პირობებში, როდესაც კიევს მშვიდობიანი გადაწყვეტის სურვილი არ აქვს, ჩვენ ვაგრძელებთ 'სპეციალურ სამხედრო ოპერაციას'. სანამ უკრაინული მხარე დაძაბულობის ესკალაციას ცდილობს, ჩვენ ვაგრძელებთ უკრაინაში უსაფრთხოების ზონის გაფართოებას“.

პესკოვმა ასევე მიუთითა, რომ უკრაინის არმიამ გააძლიერა თავდასხმები რუსეთის კონტროლის ქვეშ მყოფ ზაპოროჟიეს ატომურ ელექტროსადგურზე (NGS) და ხაზგასმით აღნიშნა, რომ ეს უკიდურესად სახიფათოა.

დიმიტრი პესკოვის თქმით, ამ საკითხთან დაკავშირებით ისინი კონტაქტზე იმყოფებიან ატომური ენერგიის საერთაშორისო სააგენტოსთან (IAEA).

პესკოვმა ასევე აღნიშნა, რომ რუსეთის პრეზიდენტ პუტინსა და აშშ-ის პრეზიდენტ დონალდ ტრამპს შორის სატელეფონო საუბარი ჯერ არ შემდგარა, თუმცა ამერიკულ მხარესთან კონტაქტები გრძელდება.

კითხვაზე: „თურქული მედია წერს, რომ თურქეთმა ამერიკული სანქციებისგან თავის დასაღწევად S-400-ები სხვაზე გაასხვისა. სთხოვა თუ არა თურქეთმა რუსეთს ამაზე ნებართვა და როგორი იყო რუსეთის რეაქცია?“, პესკოვმა უპასუხა: „ეს ძალიან სენსიტიური საკითხია. თურქეთთან ამ თემაზე გვქონდა კონტაქტი და თურქულ მხარესთან ამ საკითხზე კომუნიკაციას მომავალშიც გავაგრძელებთ“.