უკრაინის გენერალურმა შტაბმა წერილობითი განცხადება გაავრცელა რუსეთის გადაწყვეტილებასთან დაკავშირებით, რომლის მიხედვითაც, ხერსონის ოლქის ქალაქ ოლეშკიში გასამართი ჰუმანიტარული ოპერაციის გამო, 27 ოქტომბრიდან ხერსონის მიმართულებით დროებითი ცეცხლის შეწყვეტის რეჟიმი ამოქმედდება.
განცხადებაში, სადაც აღნიშნულია, რომ უკრაინამაც 27 ოქტომბერს, კიევის დროით 03:00 საათიდან რეგიონში „განსაზღვრულ ტერიტორიაზე“ ცეცხლის შეწყვეტა გამოაცხადა, ნათქვამია: „უკრაინის თავდაცვის ძალები ყველაფერს აკეთებენ ოლეშკის მცხოვრებთა დასახმარებლად და ყველა ღონეს იხმარენ ჩვენი მოქალაქეების უსაფრთხოებისა და გადარჩენის უზრუნველსაყოფად“.
არმიის მიერ გავრცელებულ მეორე განცხადებაში კი ყურადღება გამახვილდა იმაზე, რომ უკრაინის არმია მანამდეც აწვდიდა დახმარებას უპილოტო საფრენი აპარატებით (დრონებით) ოლეშკისა და მის გარშემო მდებარე დასახლებებში მყოფ მშვიდობიან მოსახლეობას: „ველით, რომ ოლეშკის მცხოვრებთათვის ჰუმანიტარულ დახმარებაზე წვდომა უზრუნველყოფილი იქნება“.
თეთრი სახლის ვებგვერდზე გამოქვეყნებულ განცხადებაში აღნიშნული იყო, რომ აშშ-ის პრეზიდენტ დონალდ ტრამპის მეუღლემ, მელანია ტრამპმა, უკრაინის ხერსონის ოლქში ორ ცეცხლს შორის მოქცეული ქალაქ ოლეშკისთვის „სპეციალურ ცეცხლის შეწყვეტას“ მიაღწია.
რუსეთის გენერალური შტაბის უფროსმა ვალერი გერასიმოვმაც განაცხადა, რომ ქალაქ ოლეშკიში ჩასატარებელი ჰუმანიტარული ოპერაციის გამო, 27 ოქტომბრიდან ხერსონის მიმართულებით დროებითი ცეცხლის შეწყვეტა იმოქმედებდა.
