ჩინეთის ქალაქ ლიაოინაში მდებარე ერთ-ერთ რესტორანში გაჩენილი ხანძრის შედეგად 22 ადამიანი დაიღუპა. პრეზიდენტმა სი ძინპინმა ხაზი გაუსვა მომხდარიდან გაკვეთილის გამოტანის აუცილებლობას და აღნიშნა, რომ ეს ხანძარი ქვეყანაში ბოლო პერიოდში გახშირებულ სასიკვდილო შემთხვევებს კიდევ ერთით დაემატა.
პეკინის სახელმწიფო მაუწყებლის ცნობით, ჩინეთის ჩრდილო-აღმოსავლეთში ქალაქ ლიაოინაში მდებარე რესტორანში სამშაბათს გაჩენილი ხანძრის შედეგად 22 ადამიანი დაიღუპა, ხოლო სამი დაშავდა.
CCTV-ის ინფორმაციით, პეკინიდან დაახლოებით 580 კილომეტრის ჩრდილო-აღმოსავლეთით, ქალაქ ლიაოინაში გაჩენილი ხანძარი „29 აპრილს, 12:25 საათზე“ დაიწყო და 14:00 საათისთვის შემთხვევას „22 ადამიანის სიცოცხლე ემსხვერპლა, 3 კი დაშავდა“. პრეზიდენტმა სი ძინპინმა ხაზგასმით აღნიშნა, რომ ხანძარმა „სიცოცხლის მნიშვნელოვანი დანაკარგი“ გამოიწვია და დასძინა, რომ გამოსატანი გაკვეთილები „უკიდურესად სასიცოცხლოა“.
სი ძინპინმა მოუწოდა „ყველა შესაძლო ძალისხმევის გაღებისკენ დაშავებულთა სამკურნალოდ, დაღუპულთა შემდგომი აუცილებელი პროცედურების ჩატარებისკენ, მათი ოჯახების მხარდაჭერისკენ, ხანძრის გამომწვევი მიზეზის სწრაფად დადგენისა და კანონის შესაბამისად პასუხისმგებლობის დაკისრებისკენ“.
AFP-ის მიერ დადასტურებულ კადრებში ჩანს ორსართულიანი რესტორნიდან ამომავალი კვამლის სქელი ღრუბლები, რომელიც ძლიერ ცეცხლშია გახვეული. ამასთან, Douyin-ზე, TikTok-ის ჩინურ ვერსიაზე, გამოქვეყნებულ სხვა დადასტურებულ ვიდეოებში ჩანს, თუ როგორ გადაჰყავთ მედიკოსებს საკაცით დაშავებული სასწრაფო დახმარების მანქანაში და როგორ ებრძვიან მეხანძრეები ცეცხლს.
როგორც წესი, არასაკმარისი სამშენებლო სტანდარტებისა და შრომის უსაფრთხოებისადმი უყურადღებო მიდგომების გამო, ჩინეთში სასიკვდილო ხანძრები შედარებით უფრო ხშირია. ამ თვეში, ჩინეთის ჩრდილოეთში, ჰებეის პროვინციაში მდებარე მოხუცებულთა თავშესაფარში გაჩენილმა ხანძარმა კიდევ 20 ადამიანის სიცოცხლე იმსხვერპლა, ხოლო იანვარში პეკინის ჩრდილო-დასავლეთით, ქალაქ ჟანგჯიაკოუში ბოსტნეულის ბაზარში გაჩენილმა ხანძარმა რვა ადამიანი იმსხვერპლა და 15 დააშავა. ამ შემთხვევამდე ერთი თვით ადრე კი, ჩინეთის აღმოსავლეთში, ქალაქ რონგჩენგში სამშენებლო მოედანზე გაჩენილი ხანძრის შედეგად ცხრა ადამიანი დაიღუპა.
