ისრაელის არმიამ განმარტა, რომ ისრაელის ჩრდილოეთით, სასაზღვრო რეგიონში, უპილოტო საფრენი აპარატის აფეთქების შედეგად ორი ჯარისკაცი დაშავდა.
ისრაელის საზოგადოებრივი მაუწყებლის ინფორმაციით, არმიამ ოთხშაბათს განაცხადა, რომ „ღამით, ლიბანის საზღვართან ასაფეთქებელი ნივთიერებით დატვირთული უპილოტო საფრენი აპარატის აფეთქების შემდეგ, ორმა ჯარისკაცმა საშუალო და მსუბუქი სიმძიმის დაზიანებები მიიღო“.
გავრცელებულ ინფორმაციაში ასევე აღნიშნულია, რომ ოთხშაბათს დილით ისრაელის სამხედრო-საჰაერო ძალებმა გაანეიტრალეს „საეჭვო საჰაერო სამიზნე“, რომელიც სამხრეთ ლიბანში მათი ქვედანაყოფების დისლოკაციის ადგილის თავზე დააფიქსირეს.
ლიბანური დაჯგუფება „ჰეზბოლას“ უპილოტო საფრენი აპარატები, განსაკუთრებით ისინი, რომლებიც ოპტიკურ-ბოჭკოვან ტექნოლოგიას იყენებენ, ისრაელისთვის მზარდ გამოწვევას და ისრაელის ჯარებისთვის პირდაპირ საფრთხეს წარმოადგენს.
აპრილის ბოლოს ისრაელის პრემიერ-მინისტრმა ბენიამინ ნეთანიაჰუმ აღიარა, რომ „ჰეზბოლას“ რაკეტები და უპილოტო საფრენი აპარატები „ორ დიდ საფრთხეს“ წარმოადგენს და სარდლებს მოსთხოვა „მიეხედათ ამ საკითხისთვის“.
2 მარტიდან ისრაელი ლიბანში ფართომასშტაბიან ოპერაციას ატარებს; ლიბანის ხელისუფლების ცნობით, ამ ოპერაციის შედეგად ათასობით ადამიანი დაიღუპა და დაიჭრა, ხოლო 1,6 მილიონზე მეტი ადამიანი იძულებით გადაადგილდა.
მიუხედავად იმისა, რომ 17 აპრილიდან ცეცხლის შეწყვეტის შეთანხმება მოქმედებს, ისრაელის ძალები, „ჰეზბოლას“ სამხედრო ინფრასტრუქტურის განადგურების საბაბით, სამხრეთ ლიბანში აგრძელებენ თავდასხმებს, რაც მოიცავს ნგრევას, სახლების განადგურებას და ათობით სოფლიდან მოსახლეობის იძულებით გადასახლებას.
ისრაელი აგრძელებს სამხრეთ ლიბანის ზოგიერთი ტერიტორიის ოკუპაციას; ამ რეგიონების ნაწილი მას წლებია დაკავებული აქვს, ნაწილი კი 2023-2024 წლების კონფლიქტის დროს ჩაიგდო ხელში. მიმდინარე შეტევის დროს ისრაელის ძალებმა ლიბანის ტერიტორიის სიღრმეში დაახლოებით 10 კილომეტრით წაიწიეს.
