აშშ-ის პრეზიდენტმა დონალდ ტრამპმა იმედი გამოთქვა, რომ ისრაელი და ირანი საბოლოოდ ცეცხლის შეწყვეტის შეთანხმებას მიაღწევენ, თუმცა აღნიშნა, რომ ზოგჯერ ქვეყნებს „ჯერ ბრძოლა უწევთ“.

ტრამპმა კიდევ ერთხელ დაადასტურა, რომ აშშ გააგრძელებს ისრაელის მხარდაჭერას მის „თავდაცვაში“. „იმედი მაქვს, რომ შეთანხმება იქნება. ვფიქრობ, ახლა შეთანხმების დროა და ვნახოთ, რა მოხდება. ზოგჯერ მათ ბრძოლა უწევთ, მაგრამ ვნახოთ, რა მოხდება,“ - განაცხადა მან.

კანადაში G7-ის სამიტზე გამგზავრებამდე ჟურნალისტებთან საუბრისას, ტრამპმა თავი შეიკავა კომენტარისგან იმის შესახებ, მოსთხოვა თუ არა ისრაელს ირანზე თავდასხმების შეწყვეტა.

აღსანიშნავია, რომ ბოლო მოვლენების ფონზე, თურქეთის პრეზიდენტმა რეჯეფ თაიფ ერდოღანმა კმაყოფილებით შეხვდა მისი ამერიკელი კოლეგის ბოლო განცხადებებს ისრაელ-ირანის კონფლიქტის დასრულებასთან დაკავშირებით. ერდოღანმა გადაუდებელი ქმედებებისკენ მოუწოდა კატასტროფის თავიდან ასაცილებლად, რომელმაც შესაძლოა მთელი რეგიონი ცეცხლის ალში გახვიოს.

თურქეთის კომუნიკაციების დირექტორატის მიერ X პლატფორმაზე კვირას გაკეთებული განცხადების თანახმად, ორმა ლიდერმა სატელეფონო საუბრისას ისრაელ-ირანის კონფლიქტი, ორმხრივი ურთიერთობები და რეგიონული საკითხები განიხილა.

აშშ-ის პრეზიდენტის სპეციალური წარმომადგენელი, სტივ უიტკოფი, კვირას ომანში უნდა ჩასულიყო ირანის წარმომადგენლებთან ბირთვული მოლაპარაკებების მორიგი რაუნდის გასამართად. თუმცა, ისრაელის თავდასხმების შემდეგ ეს შეხვედრა გაუქმდა.

ირანის საგარეო საქმეთა მინისტრმა, აბას არაღჩიმ, თავდასხმების შემდეგ ბირთვული მოლაპარაკებები „გაუმართლებლად“ შეაფასა და განაცხადა, რომ ეს თავდასხმები აშშ-ის მხარდაჭერით განხორციელდა.

ირანის სახელმწიფო მედიის ცნობით, პარასკევიდან დღემდე ისრაელის მიერ ირანზე განხორციელებული თავდასხმების შედეგად დაღუპულთა რიცხვი 224-მდე გაიზარდა, რომელთა 90% სამოქალაქო პირია.