გავრცელებული ინფორმაციით, აშშ-ის ცენტრალური სადაზვერვო სააგენტოს (CIA) დირექტორმა ჯონ რეტკლიფმა რუსეთის ფედერალური უსაფრთხოების სამსახურის (FSB) ხელმძღვანელს ალექსანდრ ბორტნიკოვს მოუწოდა, რომ რუსეთმა უკრაინასთან შეთანხმებას მიაღწიოს.
გაზეთ The New York Times-ის მიერ მოქმედ და ყოფილ ანონიმურ მაღალჩინოსნებზე დაყრდნობით გავრცელებულ სტატიაში საუბარია CIA-ის დირექტორის, რეტკლიფის მოსკოვში განხორციელებულ ვიზიტზე.
სტატიაში აღნიშნულია, რომ რეტკლიფი მოსკოვში გაემგზავრა რუსული მხარის წასახალისებლად, რათა მათ „(უკრაინასთან) შეთანხმებას მიაღწიონ მანამ, სანამ მათი სამხედრო და ეკონომიკური მდგომარეობა კიდევ უფრო გაუარესდება“.
მასალის თანახმად, რეტკლიფმა ეს გზავნილი FSB-ის დირექტორ ბორტნიკოვს გადასცა. ამასთან, აღნიშნულია, რომ ომის გაგრძელების არჩევის შემთხვევაში, CIA-ის დირექტორს რუსული მხარისთვის შესაძლო შედეგებთან დაკავშირებით „მუქარა არ გაუჟღერებია“.
სტატიაში ასევე გამოთქმულია მოსაზრება, რომ რეტკლიფის ეს ვიზიტი რუსეთსა და უკრაინას შორის „ჩიხში შესული მოლაპარაკებების“ გაცოცხლების მცდელობა იყო.
