აშშ-ის პრეზიდენტმა დონალდ ტრამპმა ხაზგასმით აღნიშნა, რომ შეერთებული შტატები გრენლანდიის საკითხზე ნატოსთან მოლაპარაკებებს აწარმოებს და აღნიშნა, რომ ამ რეგიონში მდებარე არქტიკული ტერიტორიები აშშ-ის ეროვნული უსაფრთხოებისთვის სასიცოცხლო მნიშვნელობისაა. პარასკევს ჟურნალისტებთან საუბრისას მან განაცხადა: „ნატო ჩვენთან გრენლანდიის საკითხზე კონსულტაციებს მართავს. გრენლანდია ეროვნული უსაფრთხოებისთვის ძალიან სერიოზულად გვჭირდება. თუ მას არ მოვიპოვებთ, ეროვნულ უსაფრთხოებაში დიდი ნაპრალი გაგვიჩნდება — განსაკუთრებით იმის გათვალისწინებით, რასაც „ოქროს გუმბათისა“ და სხვა საკითხების მიმართულებით ვაკეთებთ“.

ტრამპს არ დაუკონკრეტებია სამხედრო ან უსაფრთხოების ის ინიციატივები, რომლებზეც მიანიშნა, თუმცა განმარტა, რომ ვაშინგტონი ამ საკითხზე ალიანსთან აქტიურ კონტაქტზეა: „ჩვენ ნატოსთან ვსაუბრობთ“.

პარასკევს დილით ტრამპმა განაცხადა, რომ გრენლანდიასთან დაკავშირებით აშშ-ის ინტერესების მოწინააღმდეგე ქვეყნების წინააღმდეგ, შესაძლოა, ბერკეტად საბაჟო ტარიფები გამოიყენოს.

ტრამპმა გაიხსენა წარსულში საფრანგეთის პრეზიდენტ ემანუელ მაკრონთან შეხვედრა, სადაც ის საფრანგეთს წამლების ფასების გაზრდის გამო 25%-იანი საბაჟო გადასახადის დაწესებით დაემუქრა და დასძინა: „იგივეს გაკეთება გრენლანდიის შემთხვევაშიც შემიძლია“.

თეთრ სახლში გამართულ ღონისძიებაზე ტრამპმა თქვა: „თუ ქვეყნები გრენლანდიის საკითხზე არ დაგვეთანხმებიან, მათ გადასახადებს დავუწესებ, რადგან გრენლანდია ეროვნული უსაფრთხოებისთვის გვჭირდება“.

გადასახადები… შესაძლო სადამსჯელო ზომები

გასულ კვირას ტრამპმა განაცხადა, რომ აშშ-მა გრენლანდია უნდა „მოიპოვოს“, რათა აღკვეთოს რუსეთის ან ჩინეთის გავლენის ზრდა დანიის ამ ავტონომიურ რეგიონზე.

როგორც დანიამ, ისე გრენლანდიამ რეგიონის გაყიდვის შესახებ ნებისმიერი შეთავაზება უარყვეს და კუნძულზე დანიის სუვერენიტეტი კიდევ ერთხელ დაადასტურეს.

ოთხშაბათს დანიის მაღალჩინოსნები თეთრ სახლში აშშ-ის ვიცე-პრეზიდენტ ჯეი დი ვენსსა და სახელმწიფო მდივან მარკო რუბიოს შეხვდნენ.

შეხვედრის შემდეგ დანიის საგარეო საქმეთა მინისტრმა, ლარს ლოკე რასმუსენმა აღიარა, რომ მოლაპარაკებები იყო „ღია და კონსტრუქციული“, თუმცა „ფუნდამენტური უთანხმოებები“ კვლავ რჩება.

ორივე პარტიის წარმომადგენლებით დაკომპლექტებული ამერიკელი კანონმდებლების ჯგუფი პარასკევს კოპენჰაგენში იმყოფებოდა, რათა განეხილათ ტრამპის ადმინისტრაციის მუქარა გრენლანდიის ხელში ჩაგდების თაობაზე.