ღაზის ჯანდაცვის მაღალჩინოსანმა განაცხადა, რომ ისრაელის მიერ ცეცხლის შეწყვეტისა და ტყვეთა გაცვლის შეთანხმების ფარგლებში დაბრუნებულ პალესტინელი პატიმრების ცხედრებზე აღინიშნებოდა წამებისა და დამწვრობის კვალი.

„ღაზის პატიმრების ცხედრები დაგვიბრუნდა ცხოველებივით დაბმული, თვალებახვეული და საშინელი წამებისა და დამწვრობის კვალით - ეს ყველაფერი ფარულად ჩადენილი სისასტიკის მტკიცებულებაა“, -განაცხადა დოქტორ მუნირ ელ-ბურშმა, ღაზის ჯანდაცვის სამინისტროს გენერალურმა დირექტორმა, ხუთშაბათს.

ელ-ბურშმა ცხედრებზე არსებული ხილული ნიშნები „დანაშაულებად, რომელთა დამალვაც შეუძლებელია“ მოიხსენია და დასძინა, რომ ბევრი პატიმარი „დაბმული დახვრიტეს“.

„უდანაშაულო პალესტინელების ცხედრები ჯალათების სისასტიკის მოწმედ დარჩა; რადგან ისინი არ მომკვდარან ბუნებრივი სიკვდილით, არამედ დაბმული დახვრიტეს“, - თქვა ელ-ბურშმა და მოითხოვა „გადაუდებელი საერთაშორისო გამოძიება დამნაშავეების მართლმსაჯულების წინაშე წარსადგენად“, მომხდარს კი „სრულფასოვანი ომის დანაშაული“ უწოდა.

პალესტინელი პატიმრების მედია ოფისმა ასევე მიუთითა დაბრუნებულ ზოგიერთ ცხედარზე ორგანოების მოპარვის შესაძლებლობაზე.

„წინასწარი მონაცემები მიუთითებს, რომ ზოგიერთი ცხედრიდან შესაძლოა მოპარული იყოს ადამიანის ორგანოები; ეს არის დანაშაული, რომელიც აღემატება ადამიანობას და ავლენს დამპყრობლის სისტემატურ დანაშაულებრივ პრაქტიკას როგორც ცოცხალ, ისე გარდაცვლილ პალესტინელთა წინააღმდეგ“, - ნათქვამია განცხადებაში.

ოფისმა, სამედიცინო და სასამართლო ჩვენებებზე დაყრდნობით, განაცხადა, რომ მრავალი დაბრუნებული ცხედარი „ხელბორკილებით იყო, თვალებახვეული და აღინიშნებოდა მძიმე წამების, დამწვრობისა და ისრაელის ჯავშანმანქანების მიერ გადავლების კვალი“.

„მტკიცებულებები ადასტურებს, რომ ზოგიერთი მსხვერპლი დაპატიმრების შემდეგ ცივსისხლიანად დახვრიტეს, რაც საერთაშორისო ჰუმანიტარული სამართლისა და ჟენევის მეოთხე კონვენციის აშკარა დარღვევაა“, - დაამატა ოფისმა.

ოფისმა მოითხოვა „გადაუდებელი და დამოუკიდებელი საერთაშორისო გამოძიება დამნაშავეების გამოსავლენად და საერთაშორისო მართლმსაჯულების წინაშე წარსადგენად“.

ხუთშაბათს დილით, ღაზის ჯანდაცვის სამინისტრომ განაცხადა, რომ ისრაელისგან მიიღო 30 პალესტინელის სხეულის ნაწილები საერთაშორისო წითელი ჯვრის კომიტეტის მეშვეობით, ზოგიერთ მათგანზე ცუდი მოპყრობის კვალით.

ცეცხლის შეწყვეტის შეთანხმების გასული კვირის პარასკევს ამოქმედების შემდეგ, ისრაელის მიერ სულ მცირე 120 პალესტინელის ცხედარი იქნა გადაცემული.