ინდოეთის არმიამ ოთხშაბათს, ჰიმალაიზე მომხდარი სასიკვდილო წყალდიდობის შემდეგ, დაკარგული ათობით ადამიანის მოსაძებნად სამძებრო ძაღლები, უპილოტო საფრენი აპარატები და მძიმე ტექნიკა გამოიყენა.
დაღუპულია სულ მცირე ოთხი ადამიანი, დაკარგულად ითვლება 100-მდე პირი, მათ შორის 11 სამხედრო. ტალახიანი წყლისა და ნარჩენების კედელმა, რომელიც ვიწრო მთის ხეობაში დიდი სისწრაფით მიედინებოდა, უტარახანდის შტატის ქალაქ დჰარალის დაარტყა.
„დამატებითი სამხედრო ნაწილები, სამძებრო ძაღლები, უპილოტო საფრენი აპარატები, ლოგისტიკური დრონები, სამშენებლო ტექნიკა და ა.შ. რეგიონში სამაშველო სამუშაოების დასაჩქარებლად იქნა გადასროლილი,“ - ნათქვამია არმიის ოთხშაბათის განცხადებაში.
განცხადებაში ასევე აღნიშნულია, რომ „გადარჩენილთა ევაკუაციისა და პირველადი საჭიროების ნივთებისა და მედიკამენტების მიწოდებისთვის“ სამხედრო ვერტმფრენები მუშაობენ.
უტარახანდის შტატის მთავარმა მინისტრმა, პუშკარ სინგჰ დჰამიმ განაცხადა, რომ წყალდიდობა ძლიერმა „ღრუბლის გასკდომამ“ გამოიწვია და მაშველები „საომარი მდგომარეობის დონეზე“ არიან მობილიზებულნი.
ინდურ მედიაში გავრცელებულ ვიდეოებში ჩანს, თუ როგორ წალეკა ტალახიანი წყლის საშინელმა ტალღებმა სამშაბათს ნაშუადღევს ტურისტულ რეგიონში მრავალსართულიანი საცხოვრებელი კორპუსები. ზოგიერთი ადამიანი გაქცევას ცდილობდა, სანამ ნარჩენების ბნელი ტალღები შთანთქავდა მათ. ტალღებმა მთელი შენობები წაიღო.
თავდაცვის მინისტრმა, სანჯაი სეთმა სამშაბათს ღამით საინფორმაციო სააგენტო Press Trust of India-ს (PTI) განუცხადა: „მივიღე ინფორმაცია ოთხი დაღუპულისა და დაახლოებით 100 დაკარგული ადამიანის შესახებ“.
„ექსტრემალური მოვლენა“
მუსონური წვიმები კვლავ ძლიერად გრძელდება.
„მუდმივი ნალექის გამო წყლის დონის მატების გათვალისწინებით, მოსახლეობა უფრო მაღალ ადგილებში გადაიყვანეს“, - განაცხადა არმიამ.
ოთხშაბათს, მთავრობის მეტეოროლოგებმა განაცხადეს, რომ უტარახანდის ყველა მთავარი მდინარე საშიშ ნიშნულს აღემატებოდა.
არმიის მიერ შემთხვევის ადგილიდან გადაღებულ და მთავარი წყალდიდობის გავლის შემდეგ გამოქვეყნებულ კადრებში ჩანს ნელა მოძრავი ტალახის მდინარე.
ქალაქის დიდი ნაწილი ტალახითაა დაფარული, მაშველების თქმით, ზოგან ტალახის სიღრმე 15 მეტრს აღწევს და ზოგიერთი შენობა მთლიანად განადგურებულია.
მიუხედავად იმისა, რომ სასიკვდილო წყალდიდობები და მეწყერები ივნისიდან სექტემბრამდე მუსონური სეზონის დროს ხშირია, ექსპერტები ამბობენ, რომ კლიმატის ცვლილება და ურბანიზაცია ამ მოვლენების სიხშირესა და სიმძაფრეს ზრდის.
გაეროს მსოფლიო მეტეოროლოგიურმა ორგანიზაციამ გასულ წელს განაცხადა, რომ მზარდი ინტენსივობის წყალდიდობები და გვალვები მომავლის „გამაფრთხილებელი სიგნალია“, რადგან კლიმატის ცვლილება პლანეტის წყლის ციკლს სულ უფრო არაპროგნოზირებადს ხდის.
ნეპალში მდებარე ინტეგრირებული სამთო განვითარების საერთაშორისო ცენტრის ჰიდროლოგმა, მანიშ შრესტამ განაცხადა, რომ წყალდიდობის ზონაში 24 საათის განმავლობაში დაფიქსირებული 270 მმ ნალექი „ექსტრემალურ მოვლენად“ ითვლება.
შრესტამ აღნიშნა, რომ მთებში ასეთ ნალექებს ვაკეებთან შედარებით „უფრო ინტენსიური“ ეფექტი აქვს.
„ასეთი ინტენსიური ნალექების შემთხვევები სულ უფრო ხშირი ხდება და ეს შეიძლება კლიმატის ცვლილებას უკავშირდებოდეს“, - თქვა მან.
