თურქეთმა უარყო ისრაელის პრემიერ-მინისტრის ადმინისტრაციის მტკიცებები სირიასთან დაკავშირებით და განაცხადა, რომ აღნიშნული განცხადებები მიზნად ისახავს სირიის სუვერენიტეტისა და ტერიტორიული მთლიანობის წინააღმდეგ ისრაელის „უკანონო“ საჰაერო თავდასხმების გამართლებას.
თურქეთის კომუნიკაციების დეპარტამენტმა X-ზე გამოქვეყნებულ განცხადებაში აღნიშნა: „ისრაელის პრემიერ-მინისტრის ადმინისტრაციის მიერ წამოყენებული არასერიოზული მტკიცებები მიზნად ისახავს ისრაელის იმ უკანონო საჰაერო დარტყმების გამართლებას, რომლებიც სირიის სუვერენიტეტსა და ტერიტორიულ მთლიანობას უქმნის საფრთხეს“.
საჰაერო თავდასხმები იდლიბში
სამშაბათს, დილით ადრე, ისრაელის სამხედრო თვითმფრინავებმა რვა საჰაერო დარტყმა განახორციელეს სირიის ჩრდილო-დასავლეთით, იდლიბის პროვინციაში მდებარე ებუ ზუჰურის სამხედრო-საჰაერო ბაზის ასაფრენ ბილიკზე. თავდასხმის შედეგად აეროდრომის ინფრასტრუქტურა დაზიანდა.
ანკარამ განაცხადა, რომ გაჟღერებული ბრალდებები მომდინარეობს ნეთანიაჰუს განზრახვიდან, ისრაელში არჩევნების წინ გააგრძელოს „ექსპანსიონისტური და დესტაბილიზაციისკენ მიმართული პოლიტიკა“, რომლის გატარებაც მას რეგიონში სურს.
განცხადებაში ნათქვამია: „თურქეთი, საერთაშორისო საზოგადოების უდიდესი ნაწილის მსგავსად, ჩვენს რეგიონში მშვიდობის დამკვიდრების მომხრეა. ამის ერთადერთი გზაა, რომ ნეთანიაჰუმ უარი თქვას თავის აგრესიულ და თავსმოხვეულ პოლიტიკაზე და პატივი სცეს საერთაშორისო სამართალს“.
ანკარამ ასევე კიდევ ერთხელ დაადასტურა მზადყოფნა, სირიაში მშვიდობის, სტაბილურობისა და კეთილდღეობის ხელშესაწყობად სირიის მთავრობასთან ითანამშრომლოს.
„თურქეთი მტკიცედ გააგრძელებს სირიის მთავრობასთან თანამშრომლობას ლეგიტიმურ საფუძველზე სირიაში მშვიდობის, სტაბილურობისა და კეთილდღეობის დასამყარებლად და არასდროს დაუშვებს სირიის დესტაბილიზაციას“, — ნათქვამია განცხადებაში.
