აშშ-ის პრეზიდენტმა დონალდ ტრამპმა განაცხადა, რომ ირანის ომის გამო ადრე დაგეგმილი სამიტის გადადების შემდეგ, მაისში პეკინში თავის ჩინელ კოლეგას, სი ძინპინს შეხვდება.
ოთხშაბათს გაკეთებულ განცხადებაში ტრამპმა აღნიშნა, რომ მოუთმენლად ელის „ისტორიული მნიშვნელობის“ ვიზიტს, რომელიც თავდაპირველად მარტის ბოლოს იყო დაგეგმილი, ხოლო სი ძინპინსა და მის მეუღლეს წლის ბოლოს ვაშინგტონში უმასპინძლებს.
„ჩემი შეხვედრა ჩინეთის პატივცემულ პრეზიდენტ სი ძინპინთან, რომელიც ირანში ჩვენი სამხედრო ოპერაციის გამო გადაიდო, ხელახლა დაიგეგმა და 14-15 მაისს პეკინში გაიმართება“, - განაცხადა ტრამპმა სოციალურ ქსელ Truth Social-ში.
ტრამპმა დასძინა, რომ აშშ-ისა და ჩინეთის ოფიციალურმა პირებმა „დაასრულეს მზადება“ პეკინსა და ვაშინგტონში დაგეგმილი „ისტორიული“ ვიზიტებისთვის. „მოუთმენლად ველი პრეზიდენტ სისთან გატარებულ დროს, დარწმუნებული ვარ, ეს ძალიან მნიშვნელოვანი მოვლენა იქნება“, - დასძინა მან.
ტრამპი თავისი მეორე ვადის განმავლობაში პეკინში პირველად გამგზავრებას 31 მარტიდან აპრილის პირველ დღეებამდე გეგმავდა. სამიტის მიზანი მსოფლიოს ორ უმსხვილეს ეკონომიკას შორის სავაჭრო კავშირების ხელახალი დარეგულირება იყო.
თუმცა, იმ დროს, როდესაც ტრამპის ყურადღება ირანთან მიმდინარე ომზე იყო გადატანილი, მან 16 მარტს განაცხადა, რომ ჩინეთს შეხვედრის გადადება სთხოვა.
მაშინ ტრამპმა ჟურნალისტებს განუცხადა: „ომის გამო აქ ყოფნა მინდა, აქ უნდა ვიყო, ამას ვგრძნობ. ამიტომ ვითხოვეთ გადადება დაახლოებით ერთი თვით“.
ტრამპი ჩინეთში ბოლოს 2017 წელს იმყოფებოდა. ეს იყო აშშ-ის პრეზიდენტის ბოლო ვიზიტი ჩინეთში. ტრამპის ეს ახლად დაგეგმილი ვიზიტი იქნება ლიდერების პირველი პირისპირ კონტაქტი მას შემდეგ, რაც ისინი ოქტომბერში სამხრეთ კორეაში სავაჭრო ზავზე შეთანხმდნენ.
