თურქეთის წამყვან ტურისტულ ქალაქ ანტალიაში დაწყებული ფორუმი, მეოთხე წელს, დიდი გეოპოლიტიკური ცვლილებების პერიოდში, საერთაშორისო პრობლემების გადაწყვეტის გზების მოსაძებნად ერთად კრებს გლობალურ ლიდერებს, დიპლომატებს, გადაწყვეტილების მიმღებ პირებს, ექსპერტებსა და მეცნიერებს.

ღონისძიება 11 აპრილს პრეზიდენტ რეჯეფ თაიფ ერდოღანისა და საგარეო საქმეთა მინისტრ ჰაქან ფიდანის გახსნითი სიტყვებით დაიწყო.

სამდღიანი ფორუმი თემის „დანაწევრებულ მსოფლიოში დიპლომატიის დაცვა“ გარშემო იმართება და მიზნად ისახავს იმსჯელოს, თუ როგორ შეიძლება დიპლომატიის ხელახლა შემუშავება რეგიონულ და გლობალურ პრობლემებთან გასამკლავებლად.

ფორუმზე 4000-ზე მეტი მონაწილის დასწრებაა მოსალოდნელი, მათ შორის 20-ზე მეტი სახელმწიფოსა და მთავრობის მეთაურის, 70-ზე მეტი მინისტრის - რომელთაგან 50 საგარეო საქმეთა მინისტრია - და საერთაშორისო ორგანიზაციებიდან დაახლოებით 60 მაღალი დონის წარმომადგენლის ჩათვლით.

მონაწილეებს შორის არიან მეცნიერები, ექსპერტები და სტუდენტებიც. დელეგაციების ჩამოსვლასთან ერთად ანტალიის აეროპორტში მოძრაობა გაზრდილია. საერთო ჯამში, აკრედიტებულია დაახლოებით 140 ქვეყნიდან 450 წარმომადგენელი და დაახლოებით 50 ქვეყნიდან 950 ჟურნალისტი.

ფორუმის ფარგლებში 50-ზე მეტი სესია გაიმართება, სადაც განიხილება მრავალი რეგიონის საკითხები, ახლო აღმოსავლეთიდან აზია-წყნარი ოკეანის რეგიონამდე, აფრიკიდან ლათინურ ამერიკამდე, ასევე გლობალური თემები, როგორიცაა კლიმატის ცვლილება, ტერორიზმთან ბრძოლა, ჰუმანიტარული დახმარება, დიგიტალიზაცია, სურსათის უსაფრთხოება და ხელოვნური ინტელექტი.

ფორუმზე დამსწრე მაღალი რანგის პირებს შორის არიან აზერბაიჯანის პრეზიდენტი ილჰამ ალიევი, ჩრდილოეთ კვიპროსის თურქული რესპუბლიკის პრეზიდენტი ერსინ თათარი, სომალის პრეზიდენტი ჰასან შეიხ მაჰმუდი, მონტენეგროს პრეზიდენტი იაკოვ მილატოვიჩი, სიერა ლეონეს პრეზიდენტი ჯულიუს მაადა ბიო, ინდონეზიის პრეზიდენტი პრაბოვო სუბიანტო, გვინეა-ბისაუს პრეზიდენტი უმარო სისოკო ემბალო, უნგრეთის პრეზიდენტი ვიქტორ ორბანი და კოსოვოს პრეზიდენტი ვიოსა ოსმანი-სადრიუ.

დიპლომატიის გული ანტალიაში ძგერს

ანტალიის გუბერნატორმა ერსინ შაჰინმა წელს მეოთხედ გამართული ფორუმის მასპინძლობით გამოწვეული სიამაყე გამოხატა.

შაჰინმა აღნიშნა, რომ გლობალურად აღიარებული ანტალია უმასპინძლებს სახელმწიფოთა და მთავრობათა მეთაურებს, საგარეო საქმეთა მინისტრებს, მრავალი სამოქალაქო საზოგადოებისა და საერთაშორისო ორგანიზაციის წარმომადგენლებს, მენიერებსა და პრესის წარმომადგენლებს. მან ასევე ხაზი გაუსვა ქალაქის წარმატებას დიდი ორგანიზაციების მასპინძლობაში.