გაერო-ს გენერალურმა ასამბლეამ მიიღო რეზოლუცია, რომელმაც ისრაელის მიერ სირიის კუთვნილი გოლანის მაღლობების ოკუპაცია და ფაქტობრივი ანექსია „უკანონოდ“ გამოაცხადა და ისრაელისგან 1967 წლის 4 ივნისის საზღვრებში სრულად დაბრუნება მოითხოვა.
ეგვიპტის მიერ წარდგენილი ტექსტის პროექტი სამშაბათს მიიღეს: მომხრე იყო 123, წინააღმდეგი - 7, ხოლო 41-მა თავი შეიკავა.
რეზოლუციაში ნათქვამია, რომ ისრაელის 1981 წლის 14 დეკემბრის გადაწყვეტილება, გაევრცელებინა საკუთარი „კანონები, იურისდიქცია და მმართველობა“ ოკუპირებულ სირიულ გოლანზე, „ბათილია და მას არანაირი იურიდიული ძალა არ გააჩნია“.
რეზოლუცია კიდევ ერთხელ მოითხოვს ისრაელისგან, უშიშროების საბჭოს შესაბამისი გადაწყვეტილებების აღსრულების ფარგლებში, გავიდეს ოკუპირებული სირიული გოლანის მთელი ტერიტორიიდან 1967 წლის 4 ივნისის ხაზზე და ხაზს უსვამს, რომ ისრაელის მხრიდან მიმდინარე ოკუპაცია და ფაქტობრივი ანექსია „რეგიონში სამართლიანი, ყოვლისმომცველი და მდგრადი მშვიდობის დამყარებას აბრკოლებს“.
სამშაბათს, გაერო-ს უშიშროების საბჭოში სირიის წარმომადგენელმა, იბრაჰიმ ალალიმ განაცხადა, რომ ოკუპირებული გოლანის მაღლობები სირიის ტერიტორიაა და დაადასტურა მისი ქვეყნის უფლება, დაიბრუნოს ის სრულად ისრაელისგან.
სირიის სახელმწიფო ტელეარხმა Al-Ikhbariyah-მ ალალიზე დაყრდნობით გაავრცელა: „ჩვენი მოლაპარაკებები ისრაელთან, ორივე მხარის უსაფრთხოების საკითხების განსახილველად, პრეზიდენტ დონალდ ტრამპის მეთვალყურეობის ქვეშ წარიმართა“.
„სირია მშვიდობიან და დიპლომატიურ გზებს ანიჭებს უპირატესობას“, - ხაზგასმით აღნიშნა ალალიმ.
მან ასევე განმარტა, რომ მოლაპარაკებები „არანაირად არ შეეხო ოკუპირებული სირიული გოლანის ბედს“.
სირიის ელჩმა ხაზი გაუსვა: „ოკუპირებული სირიული გოლანი არაბული სირიის მიწაა და ჩვენს ქვეყანას სრული უფლება აქვს, ის მთლიანად დაიბრუნოს“.
ისრაელს გოლანის მაღლობები 1967 წლიდან აქვს ოკუპირებული, ხოლო ბაშარ ალ-ასადის რეჟიმის დაცემის შემდეგ, სამხრეთ სირიაში არსებულ ბუფერულ ზონასა და ჰერმონის მთაზე კიდევ უფრო გაფართოვდა.
მოგვიანებით ისრაელმა გამოაცხადა, რომ მხარეებს შორის 1967 წლის დაშორიშორების შეთანხმება ჩაიშალა.
