ალბანეთის ხელისუფლებამ ყველა ინტერნეტ პროვაიდერს ხუთშაბათამდე TikTok-ზე წვდომის დაბლოკვის ბრძანება მისცა.
ელექტრონული და საფოსტო კომუნიკაციების ორგანოს განცხადებით, პროვაიდერებმა აპლიკაციასთან დაკავშირებული IP მისამართები და DNS სერვერები უნდა დაბლოკონ.
პრემიერ-მინისტრმა ედი რამამ TikTok-ის აკრძალვის შესახებ პირველად დეკემბერში განაცხადა. ეს გადაწყვეტილება მას შემდეგ მიიღეს, რაც სოციალურ ქსელში დაწყებული კამათი დედაქალაქ ტირანაში, სკოლის მახლობლად ჩხუბში გადაიზარდა, რომლის შედეგადაც 14 წლის მოსწავლე გარდაიცვალა, ხოლო მეორე კი დაიჭრა.
ახალგაზრდების ფავორიტი, დებატების ცენტრში
TikTok-ს, რომელიც ვიდეოების უსასრულო ნაკადს გვთავაზობს, მსოფლიოს მასშტაბით მილიარდზე მეტი აქტიური მომხმარებელი ჰყავს და განსაკუთრებული პოპულარობა ახალგაზრდებში მოიპოვა.
თუმცა, ჩინეთში დაფუძნებული ეს პლატფორმა მუდმივად დებატების ცენტრშია.
აშშ-ში ჯაშუშობის ბრალდებით სახელგატეხილი TikTok-ი, ევროკავშირის მხრიდანაც გამოძიების ქვეშ არის რუმინეთის საპრეზიდენტო არჩევნებში ულტრამემარჯვენე კანდიდატის სასარგებლოდ მანიპულირების ბრალდებით.
ალბანეთში კი ხელისუფლებამ TikTok-ი მკაცრად გააკრიტიკა და განაცხადა, რომ ის ძალადობას, მათ შორის სკოლებში ჩხუბებსაც კი უწყობს ხელს.
ოპოზიციის რეაქცია აკრძალვაზე
ოპოზიციურმა პარტიებმა განაცხადეს, რომ საპარლამენტო არჩევნების მოახლოებამდე TikTok-ის აკრძალვა უარყოფითად იმოქმედებს მათ საარჩევნო კამპანიაზე და აკრძალვის წინააღმდეგ საპროტესტო აქციების მოწყობის მოწოდება გააკეთეს.
მთელ მსოფლიოში TikTok-ს ადანაშაულებენ მომხმარებლების დახურული კონტენტის ბუშტებში მოქცევაში, არაგამჭვირვალე ალგორითმის გამოყენებაში და განსაკუთრებით ახალგაზრდებში დეზინფორმაციის, უკანონო, ძალადობრივი ან უხამსი შინაარსის გავრცელების ხელშეწყობაში.
TikTok სხვადასხვა ვადით აკრძალეს სხვადასხვა ქვეყანაში, მათ შორის პაკისტანში, ნეპალში და საფრანგეთის ახალ კალედონიაში.
მეორე მხრივ, ცნობილია, რომ TikTok-ი ზოგიერთ ქვეყანაში დეზინფორმაციის შემცველი ვიდეოების აღმოსაჩენად ათობით გადამოწმების ორგანიზაციას უხდის.
