ჩინეთის საზღვართან მომხდარი დამანგრეველი წყალდიდობების შედეგად ნეპალში სულ მცირე 734 ადამიანი დაიღუპა, 2 498 კი დაკარგულად ითვლება. ნეპალის კატასტროფების მართვის სააგენტოს ცნობით, სამძებრო-სამაშველო ოპერაცია უკვე მეხუთე დღეა გრძელდება.
ჩინეთის სახელმწიფო მედიამ მანამდე დაადასტურა, რომ ოთხშაბათს მომხდარი სტიქიის შედეგად ტიბეტში 16 ადამიანი დაიღუპა, 546 კი დაკარგულია.
ამგვარად, დაღუპულთა საერთო რაოდენობა 750-მდე, დაკარგულთა რიცხვი კი 3 044-მდე გაიზარდა.
ნეპალში დაკარგულთა რიცხვი შაბათ საღამოს ბოლო მონაცემებით დაფიქსირებული 2 426-დან 2 498-მდე გაიზარდა.
დაკარგულთა შორის 589 უცხო ქვეყნის მოქალაქეა. მანამდე იმ უცხოელთა რიცხვი, რომლებთანაც კონტაქტი ვერ მყარდებოდა, 517-ს შეადგენდა.
კატასტროფების რისკის შემცირებისა და მართვის ეროვნული სააგენტოს ინფორმაციით, დაკარგულთა სიაში ასევე შედის 933 მუშა, რომლებიც იმ მდინარის გასწვრივ მდებარე ჰიდროელექტროსადგურების პროექტებზე მუშაობდნენ, სადაც წყალდიდობა მოხდა.
კატასტროფების მართვის უწყების ცნობით, ამ დრომდე სულ 8 186 ადამიანის გადარჩენა მოხერხდა, რომელთაგან 227 უცხოელია.
ინდოეთის ხელისუფლებამ განაცხადა, რომ ნეპალიდან მომდინარე მდინარეებში წყალდიდობის სავარაუდო მსხვერპლთაგან შვიდი ადამიანის ცხედარი იპოვეს, თუმცა ეს მონაცემები დაღუპულთა ოფიციალურ საერთო რაოდენობაში ჯერ ასახული არ არის.
