თურქეთის პრეზიდენტმა რეჯეფ თაიფ ერდოღანმა რუსეთის, უკრაინისა და ამერიკის შეერთებული შტატების ლიდერების მონაწილეობით სამიტის გამართვის წინადადება წამოაყენა და განაცხადა, რომ სურს სტამბოლი „მშვიდობის ცენტრად“ აქციოს.

ორშაბათს, მინისტრთა კაბინეტის სხდომის შემდეგ გამოსვლისას, ერდოღანმა განაცხადა, რომ მისი „უდიდესი სურვილია“ რუსეთის პრეზიდენტი ვლადიმერ პუტინი და უკრაინის პრეზიდენტი ვოლოდიმირ ზელენსკი ანალოგიურად სტამბოლში ან ანკარაში შეკრიბოს.

ერდოღანმა, რომელიც განცხადებებს აკეთებდა იმ დროს, როდესაც რუსეთისა და უკრაინის დელეგაციები სტამბოლში მოლაპარაკებების მეორე რაუნდისთვის იკრიბებოდნენ, აღნიშნა, რომ მას სურს ამ შეხვედრას ტრამპიც დაემატოს.

პრეზიდენტმა ერდოღანმა განაცხადა, რომ თუ ლიდერები თურქეთში შეიკრიბებიან, ის მათ ამ შეხვედრაზე შეუერთდება და სურს, რომ ამგვარად სტამბოლი ერთგვარ სამშვიდობო ცენტრად იქცეს.

ერდოღანმა (მოლაპარაკებები) „მნიშვნელოვან წარმატებად“ შეაფასა, რომელიც ორშაბათს გაიმართა, მას შემდეგ, რაც კვირას რუსეთში უკრაინამ 162 დრონის გამოყენებით მასშტაბური ღამის საჰაერო თავდასხმა განახორციელა. აღნიშნული თავდასხმისას სამიზნედ იქნა არჩეული 40-ზე მეტი რუსული სამხედრო თვითმფრინავი, მათ შორის ბირთვული იარაღის მატარებელი A-50, Tu-95 და Tu-22M3 მძიმე ბომბდამშენები.

სირიაში მიმდინარე მოვლენები

სირიაში მიმდინარე მოვლენებსაც შეეხო ერდოღანი და განაცხადა: „რწმენა გვაქვს, რომ სირიაში სტაბილურობისა და სიმშვიდის დამყარებით ყველა მისი მეზობელი, რეგიონის ყველა ქვეყანა ისარგებლებს“.

ერდოღანმა დადებითად შეაფასა ევროპის ქვეყნების გადაწყვეტილება სირიის მიმართ სანქციების მოხსნის შესახებ.

თურქეთის პრეზიდენტმა ასევე განაცხადა, რომ თურქული კომპანია AJet-ი სირიაში რეგულარულ რეისებს შეასრულებს, ხოლო სირიის ავიახაზებიც მალე დაიწყებს ფრენებს თურქეთში.