აზერბაიჯანმა გააკრიტიკა ისრაელის მთავრობის გადაწყვეტილება ე.წ. „სომხების გენოციდის“ აღიარების შესახებ და ისრაელს ამ ნაბიჯის გადახედვისკენ მოუწოდა.

საგარეო საქმეთა სამინისტროს მიერ გავრცელებულ განცხადებაში აღნიშნულია, რომ უწყება „სერიოზულ შეშფოთებას“ გამოთქვამს ამ გადაწყვეტილების გამო, რომელიც 1915 წლის მოვლენებთან დაკავშირებულ ისტორიულ სიმართლეს ამახინჯებს.

„1915 წლის მოვლენებთან დაკავშირებული ისტორიული სიმართლის დამახინჯება და რთული ისტორიური პროცესების პოლიტიკური გადაწყვეტილებების საგნად ქცევა, რაც მოკლებულია სამართლებრივ და სამეცნიერო საფუძვლებს, მიუღებელია“, - ნათქვამია განცხადებაში.

სამინისტრომ ხაზგასმით აღნიშნა, რომ მსგავსი გადაწყვეტილებები ხელს არ უწყობს კონსენსუსსა თუ ურთიერთგაგებას, პირიქით, აღრმავებს არსებულ განხეთქილებას და აფერხებს რეგიონში მყარი მშვიდობის დამყარებისკენ მიმართულ ძალისხმევას.

განცხადებაში, რომელიც ისრაელის მთავრობას გადაწყვეტილების გადახედვისკენ მოუწოდებს, აღნიშნულია, რომ ბაქო კვლავაც დაიცავს ისტორიულ სიმართლეს, საერთაშორისო სამართლისადმი პატივისცემასა და სამხრეთ კავკასიაში მდგრადი მშვიდობის დამყარების მცდელობებს.

„აზერბაიჯანი კვლავაც განაგრძობს თავის თანმიმდევრულ პოზიციას ისტორიული სიმართლის დაცვის, საერთაშორისო სამართლის პრინციპებისადმი პატივისცემისა და რეგიონში მდგრადი მშვიდობის ხელშეწყობის საკითხში“, - ნათქვამია დოკუმენტში.