პრეზიდენტმა რეჯეფ თაიფ ერდოღანმა განაცხადა, რომ თურქეთი კმაყოფილია იმით, თუ როგორ ცდილობს სირიელი ხალხი სირთულეების მიუხედავად საკუთარი ქვეყნის აღდგენას და აღნიშნა, რომ 10 მარტის შეთანხმების უპრობლემოდ განხორციელება ჩაშლის იმ ბოროტი განზრახვის მქონე აქტორების გეგმებს, რომლებიც სუსტი, დანაწევრებული და არასტაბილური სირიის შენარჩუნებით არიან დაინტერესებული.

სამშაბათს, ანკარაში, ადამიანის უფლებათა დღისადმი მიძღვნილ ღონისძიებაზე სიტყვით გამოსვლისას ერდოღანმა თქვა: „გასული ერთი წლის განმავლობაში, ჩვენ კმაყოფილებით ვადევნებთ თვალს სირიელი ხალხის ძალისხმევას, ყველა სირთულისა და ასადის დიქტატურის მიერ დატოვებული ნგრევის მიუხედავად, აღადგინონ საკუთარი ქვეყანა“.

პრეზიდენტმა ხაზგასმით აღნიშნა, რომ თურქეთი და თურქი ერი ყველა არსებული საშუალებით უჭერს მხარს სირიისა და სირიელი ხალხის რეკონსტრუქციის, მოძლიერებისა და ფეხზე დადგომის მცდელობებს.

ერდოღანმა ასევე დასძინა, რომ პალესტინელი ჩაგრული ხალხი „იხილავს, თუ როგორ დაგვირგვინდება მათი მოთმინება გამარჯვებით, და რომ თავისუფლება და მშვიდობა დადგება სუვერენულ პალესტინის სახელმწიფოსთან ერთად, რომლის დედაქალაქი აღმოსავლეთ იერუსალიმი იქნება“.

10 მარტს, სირიის პრეზიდენტის ადმინისტრაციამ განაცხადა, რომ პრეზიდენტ აჰმედ შარასა და სირიის დემოკრატიულ ძალებს შორის, რომელსაც ტერორისტული ორგანიზაცია YPG/PKK აკონტროლებს, შეთანხმება მიღწეულია.

შეთანხმება ითვალისწინებს ცეცხლის შეწყვეტას ქვეყნის მასშტაბით, ზოგადად განსაზღვრავს სირიის დემოკრატიულ ძალების სირიის არაბული რესპუბლიკის ინსტიტუტებში ინტეგრაციის პროცესს, ხაზს უსვამს ქვეყნის ტერიტორიულ მთლიანობას და უარყოფს ნებისმიერი სახის სეპარატიზმს.