ბელგიის ქალაქ ლიეჟში მოსწავლეთა აქციები გრძელდება. წინა დღით განვითარებული მოვლენების გამო, გადაწყდა, რომ ზოგიერთი საშუალო სასწავლებელი დღეს დაიხურება; აქციები ასევე გაიმართა სხვა ქალაქებშიც.

ოფიციალური საინფორმაციო სააგენტო Belga-ს ცნობით, დღეს დილით საშუალო სკოლა „Athenee Royal Liege Atlas“-ის წინ დაახლოებით 400 ახალგაზრდა შეიკრიბა. იმ სკოლის მიმდებარედ, რომელიც ღია დარჩა, ფოიერვერკები გაუშვეს, რამაც საგზაო მოძრაობის შეფერხება გამოიწვია.

საშუალო სკოლების, „Saint-Luc“-ისა და „Liege 1“-ის მოსწავლეთა ჯგუფმა განაცხადა, რომ მათ მშვიდობიანი აქციის გამართვა სურდათ.

მოსწავლეების საპროტესტო აქციები მოეწყო ლიეჟის პროვინციაში, ქალაქ ჰერსტალში მდებარე „IPES“-ის საშუალო სკოლაშიც. მეხანძრე-მაშველების ინფორმაციით, ქალაქ ანსში, სადაც ასევე მიმდინარეობდა მოსწავლეთა პროტესტი, შეტაკებები მოხდა. ჰუიში კი დაახლოებით 70-მა მოსწავლემ ქალაქის ცენტრში, სკოლებს შორის მსვლელობა გამართა, რა დროსაც კვამლის ბომბები და ფოიერვერკები გამოიყენეს.

ცნობილია, რომ ლიეჟში სკოლები, რომელთა დახურვის გადაწყვეტილებაც მიიღეს, მუნიციპალური და დამოუკიდებელი საგანმანათლებლო ქსელების საშუალო სკოლებს წარმოადგენს.

საფრანგეთიდან ბელგიაში გადასული სტუდენტური პროტესტი

საფრანგეთში სასწავლო პირობების გაუმჯობესების მოთხოვნით დაწყებული ლიცეუმების პროტესტისა და სკოლების ბლოკირების შემდეგ, ბელგიელმა მოსწავლეებმაც დაიწყეს საპროტესტო აქციების გამართვა.

წინა დღით გამართულ აქციებზე, სადაც მრავალი სკოლის შესასვლელი გადაკეტეს, „Institut Marie-Therese“-ის წინ ცეცხლი დაანთეს, რის გამოც ადგილზე პოლიციის მობილიზება გახდა საჭირო.

პოლიციამ განაცხადა, რომ ზოგიერთი სკოლის წინ ისროდნენ ფოიერვერკებს, კვერცხებს, ვაშლებსა და დამცავ ბარიერებს, რის შედეგადაც სხვადასხვა ადგილას მატერიალური ზიანი მიადგა ქონებას.

მომხდართან დაკავშირებით დაიწყო გამოძიება, გუშინ კი ლიეჟში 6 პირი დააკავეს.

მოსწავლეები მოითხოვენ კლასებში მოსწავლეთა რაოდენობის შემცირებას, მასწავლებელთა საკმარისი რაოდენობით დანიშვნას, გადაწყვეტილების მიღების პროცესში მოსწავლეებისა და მშობლების აზრის უფრო მეტად გათვალისწინებას და განათლების ყველასთვის ხელმისაწვდომობას.