პოლიციის განცხადებით, ბელგიის აღმოსავლეთით მდებარე ქალაქ ლიეჟში აფეთქების შედეგად სინაგოგა დაზიანდა, შემთხვევის მიზეზები კი დგინდება.

ლიეჟის პოლიციის პრესსპიკერმა განაცხადა, რომ დაშავებულების შესახებ ინფორმაცია არ შესულა და ადგილი ჰქონდა „მხოლოდ მატერიალურ ზარალს“.

პრესსპიკერმა დასძინა, რომ აფეთქება ორშაბათს, ადგილობრივი დროით დაახლოებით 04:00 საათზე, სინაგოგის წინ მოხდა, რის შედეგადაც გზის მოპირდაპირე მხარეს მდებარე შენობებში მინები ჩაიმსხვრა.

ფრანგულენოვანი საზოგადოებრივი მაუწყებლის, RTBF-ის ცნობით, ტერიტორიაზე უსაფრთხოების კორდონი შეიქმნა და ადგილზე ფედერალური პოლიციის მისვლას ელოდებიან.

საკუთარ ვებგვერდზე განთავსებული ინფორმაციის თანახმად, 1899 წელს აშენებული სინაგოგა, იმავდროულად, მუზეუმის ფუნქციასაც ასრულებს, რომელიც ლიეჟის ებრაული თემის ისტორიას წარმოაჩენს.