მარკ რუტემ პარასკევის შეხვედრის წინ ჟურნალისტებთან საუბრისას განაცხადა: „ჩვენ უფრო ძლიერი ევროპისა და უფრო ძლიერი ნატოს გზაზე ვართ, რაც იმას ნიშნავს, რომ დროთა განმავლობაში, ნაბიჯ-ნაბიჯ, შევამცირებთ ჩვენს დამოკიდებულებას ერთ მოკავშირეზე, როგორც ეს დიდი ხნის განმავლობაში იყო“.
რუტეს თქმით, ეს ცვლილება, ევროპელი მოკავშირეების მიერ თავდაცვის ხარჯების ზრდასთან ერთად, აშშ-ს მისცემს მეტ სივრცეს სხვა პრიორიტეტებზე ფოკუსირებისთვის.
ნატოს გენერალურმა მდივანმა დაამატა: „ეს აუცილებელია არა მხოლოდ იმისთვის, რომ თქვენი ხარჯები აშშ-ისას გაუთანაბროთ, არამედ იმისათვის, რომ დარწმუნდეთ, რომ გვაქვს ის, რაც გვჭირდება ჩვენი მოწინააღმდეგეებისგან თავის დასაცავად“.
რუტემ ხაზგასმით აღნიშნა, რომ აშშ კვლავაც შეასრულებს საკვანძო როლს ევროპის ბირთვულ და კონვენციურ თავდაცვაში, თუმცა ევროპელები უფრო დიდ პასუხისმგებლობას აიღებენ.
„ევროპელებმა გაიგეს გზავნილი ევროპაში არსებულ ბაზებთან დაკავშირებით. ეს არის ორმხრივი ვალდებულებები, რომლებიც აშშ-ს შეუძლია გამოიყენოს თავისი ოპერაციებისთვის მსოფლიოს სხვა ნაწილებში“, — განაცხადა რუტემ.
ეს განცხადებები გაკეთდა აშშ-ის იმ ბოლოდროინდელი კრიტიკის ფონზე, რომელიც ეხებოდა ალიანსის ზოგიერთი წევრის მიერ ირანის წინააღმდეგ ომის დროს სამხედრო ბაზების გამოყენებაზე ნებართვის არმიცემას.
რუტემ კიდევ ერთხელ დაადასტურა, რომ ევროპელი მოკავშირეები ასრულებენ ორმხრივი ვალდებულებებით გათვალისწინებულ მოთხოვნებს სამხედრო ბაზებზე წვდომასთან დაკავშირებით და ასევე ყურადღება გაამახვილა ევროპელი მოკავშირეების ძალისხმევაზე ჰორმუზის სრუტეში.
ნატოს გენერალურმა მდივანმა დაამატა: „ჰორმუზის სრუტე ამჟამად დაკეტილია და თავისუფალი ნავიგაცია აქ სერიოზული საფრთხის ქვეშაა. შესაბამისად, ეს, რა თქმა უნდა, ინტერესის სფეროა არა მხოლოდ ნატოსთვის, არამედ შესაძლოა ყველა მოკავშირისთვის, როგორც ერთიანი ალიანსისთვის; ჩვენ აშკარად იქ ვიქნებით, სადაც დახმარება შეგვიძლია“.
