ნეთანიაჰუს „ლიკუდის“ პარტიამ კვირას გაავრცელა განცხადება, რომელშიც ნათქვამია, რომ დაიწყებენ ინიციატივას, რათა ხელი შეუშალონ არაბული უმრავლესობის მქონე ორი პარტიის მონაწილეობას 27 ოქტომბრის ქნესეთის არჩევნებში.

„ლიკუდის“ განცხადებით, მათ გეგმაშია შესაბამისი განაცხადის შეტანა, რათა „ერთობლივი სიისა“ და „გაერთიანებული არაბული სიის“ (რომელსაც „რაამი“ ჰქვია) მონაწილეობა არჩევნებში უარყოფილ იქნას.

პარტიამ ორივე პოლიტიკური გაერთიანება „ტერორიზმის“ მხარდაჭერაში დაადანაშაულა, მიზეზად კი დაასახელა ის, რომ თითქოს ისინი შეურაცხყოფენ ისრაელელ ჯარისკაცებს და უარს აცხადებენ „ჰამასი“ და „ჰეზბოლა“ „ტერორისტულ ორგანიზაციებად“ მოიხსენიონ. განცხადებაში ამ ბრალდებების დასადასტურებლად არანაირი მტკიცებულება წარდგენილი არ ყოფილა.

ეს ნაბიჯი მაშინ გადაიდგა, როდესაც „ლიკუდმა“ გააძლიერა თავდასხმები პარტია „იაშარის“ ლიდერის, გენშტაბის ყოფილი უფროსის, გადი ეიზენკოტის წინააღმდეგ, რომელიც ნეთანიაჰუს მთავარ მეტოქედ იქცა.

„ლიკუდმა“ აღნიშნული ორი არაბული პარტია ეიზენკოტის „ბუნებრივ პარტნიორებად“ მოიხსენია და განაცხადა, რომ ეიზენკოტი მთავრობის ჩამოსაყალიბებლად ოპოზიციის ლიდერების - იაირ გოლანისა და ავიგდორ ლიბერმანის გარდა, სწორედ ამ პარტიების იმედზე იქნება.

თუ „ერთობლივი სია“ ისრაელში არაბულ პოლიტიკურ პარტიებს აერთიანებს, მანსურ აბასის ხელმძღვანელობით მოქმედი „რაამი“ ალიანსიდან გასვლის შემდეგ არჩევნებში დამოუკიდებლად მონაწილეობს.

„რაამი“ იყო პირველი არაბული პარტია, რომელიც 2021 წელს ისრაელის სამთავრობო კოალიციაში შევიდა.

მიუხედავად იმისა, რომ ბოლო გამოკითხვები ეიზენკოტის პარტია „იაშარს“ „ლიკუდზე“ წინ აჩვენებს, არც ნეთანიაჰუს ბლოკს და არც ოპოზიციას არ გააჩნია მკაფიო უპირატესობა, რათა მთავრობის ჩამოსაყალიბებლად საჭირო 61 მანდატს მიაღწიოს.

ამ ჩიხურმა სიტუაციამ შესაძლოა არაბულ პარტიებს არჩევნების შემდგომ კოალიციურ მოლაპარაკებებში მნიშვნელოვანი როლი მიანიჭოს.