სომხეთის სახელმწიფო სააგენტო „არმენპრესის“ ცნობით, ფაშინიანმა, რომელმაც 7 ივნისის არჩევნებში პარლამენტში უმრავლესობა მოიპოვა, მინისტრთა კაბინეტის სხდომაზე განაცხადა, რომ ქვეყანა საექსპორტო გზების დივერსიფიკაციას ისახავს მიზნად.

ამ კონტექსტში, ფაშინიანმა სომხეთ-თურქეთის რკინიგზის სწრაფად გახსნის იმედი გამოთქვა და აღნიშნა:

„ახალქალაქი-ყარსის რკინიგზის ორივე ხაზი ფუნქციონირებს. ეს საკითხი საქართველოს პრემიერ-მინისტრთანაც განვიხილე და მან დამარწმუნა, რომ ორივე მიმართულებით პრობლემა არ შეიქმნება. ამ თემაზე თურქეთის პრეზიდენტსაც ვესაუბრე და მანაც დაადასტურა, რომ ეს ხაზები ღიაა. ვიმედოვნებთ, რომ სომხეთ-თურქეთის რკინიგზაც უმოკლეს ვადებში გაიხსნება“.

ფაშინიანმა ხაზგასმით აღნიშნა, რომ შესაძლებლობები მნიშვნელოვნად გაიზრდება პროექტის – „ტრამპის მარშრუტი საერთაშორისო მშვიდობისა და კეთილდღეობისთვის“ (TRIPP) – ფარგლებში, რომელიც აზერბაიჯანის ძირითად ნაწილს ნახიჩევანთან დააკავშირებს. მან დასძინა, რომ სომხეთის მთავრობა მუდმივად მუშაობს ბაზრების დივერსიფიკაციაზე და ეს პროცესი უკვე იძლევა შედეგებს.

პრემიერ-მინისტრმა ასევე ისაუბრა ლოგისტიკური ცენტრების შექმნის სტიმულირების აუცილებლობაზე და ხაზი გაუსვა ექსპორტის გაზრდის საჭიროებას.