უკრაინის პრეზიდენტმა ვოლოდიმირ ზელენსკიმ New York Post-თან ინტერვიუში განაცხადა, რომ პრეზიდენტ დონალდ ტრამპთან განიხილა შეთანხმება ვაშინგტონის მიერ უკრაინისგან ბრძოლის ველზე გამოცდილი დრონების შეძენის და კიევის მიერ აშშ-დან იარაღის მიღების შესახებ.

ზელენსკიმ აღნიშნა, რომ უკრაინაში წარმოებულ უპილოტოებს შეუძლიათ რუსეთის ტერიტორიაზე 1300 კილომეტრის სიღრმეზე მიზნების დარტყმა.

ოთხშაბათს ჩაწერილ ინტერვიუში ზელენსკიმ The Post-ს განუცხადა: "ამერიკელ ხალხს ეს ტექნოლოგია სჭირდება და ის აუცილებლად უნდა იყოს თქვენს ინვენტარში."

უკრაინელმა ლიდერმა თქვა, რომ უპილოტოები არის მთავარი ინსტრუმენტი, რომელიც მის ქვეყანას რუსეთის შეჭრის წინააღმდეგ სამ წელზე მეტი ხნის განმავლობაში წინააღმდეგობის გაწევის საშუალებას აძლევს.

"ჩვენ მზად ვართ ეს გამოცდილება გავუზიაროთ ამერიკას და სხვა ევროპელ პარტნიორებს," - განაცხადა ზელენსკიმ და აღნიშნა, რომ მოლაპარაკებები ასევე მიმდინარეობს დანიასთან, ნორვეგიასთან და გერმანიასთან.

ახალი მთავრობის წარდგენისას პარლამენტში გამოსვლისას ზელენსკიმ განაცხადა, რომ აშშ-თან გარკვეული შეთანხმებები გაფორმდება, რაც მის ქვეყანას გააძლიერებს, თუმცა დეტალები არ დაუკონკრეტებია.

მეორე მხრივ, აშშ-ის მომავალი წლის თავდაცვისა და ეროვნული უსაფრთხოების ბიუჯეტის მოთხოვნაში გათვალისწინებულია მცირე ზომის უპილოტოებზე ხარჯების გაზრდა. აღინიშნება, რომ ამ ზრდაზე გავლენა იქონია უკრაინაში მიმდინარე ომის დროს უპილოტოების, როგორც დაბალფასიანი, მაგრამ მაღალეფექტური საბრძოლო ელემენტის გამოჩენამ.