დეკლარაციაში ხაზგასმულია, რომ წევრი ქვეყნები ანკარაში შეიკრიბნენ, რათა დაადასტურონ თავიანთი „ურყევი ერთგულება“ ნატოს კოლექტიური თავდაცვის მე-5 მუხლისა და ტრანსატლანტიკური კავშირის მიმართ. მასში ნათქვამია: „თავდასხმა ერთ მოკავშირეზე არის თავდასხმა ყველა მოკავშირეზე. ჩვენი ერთიანობა, სოლიდარობა და კოლექტიური ძალა კვლავ რჩება მშვიდობის, უსაფრთხოებისა და კეთილდღეობის საფუძვლად ჩვენი ალიანსის თავისუფალი და დემოკრატიული ქვეყნების 1 მილიარდი მოქალაქისთვის. ჩვენ ერთგული ვართ შეკავებისა და თავდაცვისადმი 360-გრადუსიანი მიდგომისადმი“.

დეკლარაციაში აღნიშნულია, რომ „ევროატლანტიკური უსაფრთხოებისა და სტაბილურობისთვის რუსეთის მხრიდან მომავალი გრძელვადიანი საფრთხისა და ტერორიზმის მუდმივი საფრთხის წინააღმდეგ საბრძოლველად, მოკავშირეებმა აამუშავეს ჰააგის თავდაცვის ვალდებულება“. ხაზგასმულია, რომ ევროპელმა მოკავშირეებმა და კანადამ 2025 წელს ძირითადი თავდაცვის საჭიროებებისთვის ინვესტიციები 139 მილიარდ დოლარზე მეტით გაზარდეს.

50 მილიარდ დოლარზე მეტი ღირებულების ახალი შესყიდვების შეთანხმება

დეკლარაციაში მითითებულია, რომ ინვესტიციები არა მხოლოდ უზრუნველყოფს საჭირო შესაძლებლობებს, არამედ აძლიერებს თავდაცვის ინდუსტრიასა და მდგრადობას:

„დღეს ანკარაში ვაცხადებთ 50 მილიარდ დოლარზე მეტი ღირებულების ახალ შესყიდვების შეთანხმებას და ვიღებთ ვალდებულებას, ვიმუშაოთ ინდუსტრიასთან ერთად კოლექტიური წარმოების შესაძლებლობების გასაზრდელად და ინოვაციების დასაჩქარებლად. ჩვენ გავაგრძელებთ მუშაობას მოკავშირეებს შორის თავდაცვის სფეროში სავაჭრო ბარიერების აღმოსაფხვრელად და გამოვიყენებთ ნატოს პარტნიორობას თავდაცვის ინდუსტრიაში თანამშრომლობის მაქსიმალურად გასაღრმავებლად“.

დოკუმენტში ნათქვამია, რომ მომავლის მშენებლობისთვის მიზნად ისახება უფრო ძლიერი ევროპა უფრო ძლიერ ნატოში და მოდერნიზებული ალიანსი. აღინიშნა, რომ ევროპელი მოკავშირეები და კანადა, აშშ-სთან ერთად, ალიანსის თავდაცვაზე მეტ პასუხისმგებლობას იღებენ.

დეკლარაციის თანახმად, ნატოს შეკავება და თავდაცვა ეფუძნება ბირთვული, კონვენციური და სარაკეტო თავდაცვის შესაძლებლობების შესაბამის კომბინაციას, რომელიც გამყარებულია კოსმოსური და კიბერ ელემენტებით.

საბრძოლო უპირატესობის შენარჩუნების საკითხში გამოხატულია მტკიცე პოზიცია: „ჩვენ ინვესტიციას ვახორციელებთ ჩვენი შეიარაღებული ძალების განლაგების, მხარდაჭერისა და მდგრადობის უზრუნველყოფის შესაძლებლობებში; ვახორციელებთ დასახულ მიზნებს ყველა სფეროში, მათ შორის შორ მანძილზე ზუსტი დარტყმის, ინტეგრირებული საჰაერო და სარაკეტო თავდაცვის, უპილოტო სისტემების, მოწინავე ტექნოლოგიებისა და სადაზვერვო შესაძლებლობების მიმართულებით. ვავითარებთ ურთიერთთავსებად ტრანსატლანტიკურ საბრძოლო ღრუბელს (combat cloud) და ვნერგავთ ხელოვნური ინტელექტის მძლავრ მოდელებს“.

უკრაინის მხარდაჭერა

დეკლარაციაში ნათქვამია, რომ უკრაინას წვლილი შეაქვს ტრანსატლანტიკურ უსაფრთხოებაში და ხაზგასმულია მოკავშირეების ერთიანი და ურყევი მხარდაჭერა უკრაინის თავისუფლების, სუვერენიტეტისა და ტერიტორიული მთლიანობის დაცვის მიმართ.

აღინიშნა, რომ ევროპელი მოკავშირეები და კანადა ახლა უკრაინისთვის უსაფრთხოების დახმარების დიდ ნაწილს ორმხრივი და მრავალმხრივი გზებით აფინანსებენ: „მოკავშირეები ხაზს უსვამენ, რომ ეს მხარდაჭერა გრძელვადიან პერსპექტივაში უნდა იყოს სამართლიანი, პროგნოზირებადი და მდგრადი. მოკავშირეები 2026 წლისთვის იღებენ ვალდებულებას გამოყონ 70 მილიარდი ევრო უკრაინის სამხედრო აღჭურვილობის, დახმარებისა და წვრთნებისთვის, ხოლო 2027 წელსაც ადასტურებენ სუვერენულ ვალდებულებას მინიმუმ იმავე დონის მხარდაჭერის გაგრძელების შესახებ“. ასევე, მიესალმნენ ევროკავშირის გადაწყვეტილებას უკრაინისთვის მრავალწლიანი ფინანსური დახმარების შესახებ.

ნავიგაციის თავისუფლება ჰორმუზის სრუტეში

დეკლარაციაში ყურადღება გამახვილდა იმაზე, რომ ალიანსი აგრძელებს რეაგირებას და ადაპტაციას სტრატეგიულ კონკურენციაზე, ფართოდ გავრცელებულ არასტაბილურობაზე, ჰიბრიდულ საფრთხეებსა და განმეორებად კრიზისებზე: „მოკავშირეები კიდევ ერთხელ ადასტურებენ, რომ ირანს არასოდეს უნდა ჰქონდეს ბირთვული იარაღი და მოუწოდებენ ირანს სრულად სცეს პატივი ნავიგაციის თავისუფლებას ჰორმუზის სრუტეში“.

დასასრულს ნათქვამია: „მადლობას ვუხდით თურქეთს გამოჩენილი გულუხვი მასპინძლობისთვის. მოველით ერთმანეთთან შეხვედრას შემდეგ სხდომაზე“.