ვენესუელაში აშშ-ის ბოლო სამხედრო ინტერვენციის შემდეგ, ევროკავშირის ოცდაექვსმა წევრმა ქვეყანამ საერთაშორისო სამართლის დაცვის მოთხოვნით სიმშვიდისა და თავშეკავებისკენ მოუწოდა.

ევროკავშირის უმაღლესი წარმომადგენლის საგარეო საქმეთა და უსაფრთხოების პოლიტიკის საკითხებში, კაია კალასის მიერ კვირა ღამით გამოქვეყნებულ ერთობლივ განცხადებაში ნათქვამია: „ევროკავშირი მოუწოდებს ყველა აქტორს სიმშვიდისა და ზომიერებისკენ, რათა თავიდან იქნას აცილებული კრიზისის ესკალაცია და უზრუნველყოფილ იქნას მშვიდობიანი გადაწყვეტა. ევროკავშირი შეახსენებს ყველას, რომ ნებისმიერ შემთხვევაში დაცული უნდა იყოს საერთაშორისო სამართლისა და გაეროს წესდების პრინციპები“.

განცხადებას მხარი დაუჭირა 26-მა წევრმა ქვეყანამ (უნგრეთის გამოკლებით). დოკუმენტში ხაზგასმულია გაეროს უშიშროების საბჭოს წევრების „განსაკუთრებული პასუხისმგებლობა“ საერთაშორისო სამართლის პრინციპების დაცვაში, რაც საერთაშორისო უსაფრთხოების არქიტექტურის ქვაკუთხედია.

განცხადებაში ნათქვამია: „ევროკავშირმა არაერთხელ აღნიშნა, რომ ნიკოლას მადუროს არ გააჩნია დემოკრატიულად არჩეული პრეზიდენტის ლეგიტიმაცია და მხარი დაუჭირა მშვიდობიან დემოკრატიულ გარდამავალ პროცესს ვენესუელას ხელმძღვანელობით, ქვეყნის სუვერენიტეტის პატივისცემით. პატივი უნდა ვცეთ ვენესუელელი ხალხის უფლებას, თავად განსაზღვრონ საკუთარი მომავალი“. ასევე ხაზი გაესვა საერთაშორისო ორგანიზებულ დანაშაულთან და ნარკოტრაფიკთან ბრძოლის აუცილებლობას საერთაშორისო სამართლის, ტერიტორიული მთლიანობისა და სუვერენიტეტის პრინციპების სრული დაცვით.

„ჩვენ მჭიდრო კავშირში ვართ აშშ-სთან, ასევე რეგიონულ და საერთაშორისო პარტნიორებთან; ვმუშაობთ დიალოგის მხარდასაჭერად და ხელშესაწყობად ყველა ჩართულ მხარესთან. ეს დიალოგი უნდა მივიდეს ვენესუელელების მიერ წარმართულ, დემოკრატიულ, ინკლუზიურ და მშვიდობიან გადაწყვეტამდე“, - ნათქვამია ტექსტში.

აშშ-ის სამხედრო ინტერვენცია

განცხადება ასევე მოუწოდებს პატივი სცენ ვენესუელელი ხალხის ნებას „დემოკრატიის აღდგენისა და არსებული კრიზისის მოგვარების შესახებ“. „ვენესუელაში დაკავებული ყველა პოლიტიკური პატიმარი უპირობოდ უნდა გათავისუფლდეს. ევროკავშირის წევრი ქვეყნების საკონსულო ორგანოები მჭიდრო კოორდინაციით მუშაობენ ევროკავშირის მოქალაქეების უსაფრთხოების დასაცავად, მათ შორის იმათი, ვინც უკანონოდ იმყოფება პატიმრობაში“.

ეს განცხადება მოჰყვა პრეზიდენტ დონალდ ტრამპის სიტყვებს იმის შესახებ, რომ აშშ-ის სამხედრო ოპერაცია ვენესუელაში ნიკოლას მადუროსა და მისი მეუღლის, სილია ფლორესის დაკავებით დასრულდა. ტრამპმა ასევე პირობა დადო, რომ საჭიროების შემთხვევაში, ამერიკული ჯარების მეშვეობით ქვეყანაზე დროებით ამერიკულ კონტროლს დაამყარებდა.

მადურო და ფლორესი შაბათს ღამით ნიუ-იორკში ჩაიყვანეს და ისინი ბრუკლინის წინასწარი დაკავების იზოლატორში იმყოფებიან. წყვილს ბრალი ედება აშშ-ის ფედერალურ დანაშაულებში, რომლებიც დაკავშირებულია ნარკოტრაფიკთან და ტერორისტულ ორგანიზაციებად მიჩნეულ დაჯგუფებებთან თანამშრომლობასთან.

მაშინ როცა მადურო ბრალდებებს უარყოფს, ვენესუელის დედაქალაქ კარაკასის ოფიციალური პირები წყვილის გათავისუფლებას მოითხოვენ.