ევროკავშირმა უკრაინის დაფინანსების საჭიროებების დასაკმაყოფილებლად და რეფორმების მხარდასაჭერად 2,9 მილიარდი ევროს ოდენობის ახალი ფინანსური რესურსი გამოყო.
ევროკომისიამ განაცხადა, რომ ქვეყანას ახალი დახმარება გადაეცა ფინანსური დახმარების პროგრამის ფარგლებში, რომელიც უკრაინის ეკონომიკური აღდგენის, რეფორმებისა და გაწევრიანების პროცესის მხარდასაჭერად შეიქმნა.
განცხადებაში ნათქვამია: „უკრაინის დაფინანსების საჭიროებების მხარდასაჭერად და სახელმწიფო მმართველობის ფუნქციონირების უზრუნველსაყოფად, ქვეყანას 2,9 მილიარდი ევროს ოდენობის რესურსი გამოეყო“.
განცხადებაში ნათქვამია, რომ აღნიშნული თანხიდან 800 მილიონი ევრო გამოყოფილია სულ 90 მილიარდი ევროს მოცულობის „უკრაინის მხარდაჭერის სესხის“ პროგრამიდან, ხოლო გადარიცხვა განხორციელდა მას შემდეგ, რაც უკრაინამ რეფორმები გაატარა ისეთ სფეროებში, როგორიცაა მართლმსაჯულება, ფინანსური ბაზრები, ბიზნესგარემო, ენერგეტიკა, ტრანსპორტი, სოფლის მეურნეობა და „მწვანე“ ტრანსფორმაცია.
განცხადების თანახმად, ეს არის მე-8 ტრანში უკრაინის ფინანსური დახმარების პროგრამის ფარგლებში, ხოლო ბოლო გადარიცხვის ჩათვლით, „უკრაინის გეგმის“ ფარგლებში გაწეულმა მთლიანმა მხარდაჭერამ 32 მილიარდ ევროს გადააჭარბა.
განცხადებაში ასევე აღნიშნულია, რომ წლის დარჩენილ პერიოდში უკრაინისთვის გასაწევი შესაძლო ფინანსური მხარდაჭერა 33,7 მილიარდ ევროს შეადგენს, საიდანაც 16,6 მილიარდი ევრო თავდაცვითი მრეწველობის შესაძლებლობების გაძლიერებას, ხოლო 17,1 მილიარდი ევრო საბიუჯეტო მხარდაჭერას მოხმარდება.
აქვე ხაზგასმულია, რომ დამატებითი გადარიცხვები დამოკიდებულია უკრაინის მიერ შეთანხმებული რეფორმებისა და პოლიტიკური პირობების შესრულებაზე.
უკრაინის ფინანსური დახმარების პროგრამა 2024-2027 წლებში ქვეყნის ფინანსური სტაბილურობის, აღდგენისა და მოდერნიზაციის მხარდასაჭერად 50 მილიარდ ევროზე მეტი ოდენობის გრანტებსა და სესხებს ითვალისწინებს.
ევროკავშირის „უკრაინის მხარდაჭერის სესხის“ პროგრამა, რომელიც 2026 და 2027 წლებს მოიცავს, სულ 90 მილიარდი ევროს დაფინანსებას ითვალისწინებს, მათ შორის 60 მილიარდ ევროს — უკრაინის თავდაცვისუნარიანობისა და თავდაცვითი მრეწველობის გასაძლიერებლად, ხოლო 30 მილიარდ ევროს — სახელმწიფოს ფუნქციონირებისა და ძირითადი საჯარო სერვისების უზრუნველყოფის საბიუჯეტო მხარდაჭერისთვის.
