ამერიკულ გაზეთ New York Times-ში გამოქვეყნებული სტატიის თანახმად, აშშ-ის სამხედრო იერიშის შედეგად ვენესუელაში, რომლის მიზანიც პრეზიდენტ ნიკოლას მადუროს „გატაცება“ იყო, სულ მცირე 40 ადამიანი დაიღუპა.

ანგარიში, რომელიც ეყრდნობა ვენესუელელ მაღალჩინოსანს (რომელმაც ანონიმურობის პირობით ისაუბრა), აღნიშნავს: „თავდასხმის შედეგად სულ მცირე 40 ადამიანი დაიღუპა, მათ შორის სამოქალაქო პირები და სამხედროები“.

ამერიკელმა მაღალჩინოსნებმა გაზეთს განუცხადეს, რომ იერიში მოიცავდა ფართომასშტაბიან საჰაერო ოპერაციას, რომლის მიზანიც სახმელეთო ჯარების გადასხმამდე ვენესუელის საჰაერო თავდაცვის განეიტრალება იყო.

ანგარიშში, ამერიკელ ოფიციალურ პირებზე დაყრდნობით, ნათქვამია: „საჰაერო თავდაცვის გასანადგურებლად აშშ-ის 150-ზე მეტი თვითმფრინავი გაიგზავნა, რათა სამხედრო ვერტმფრენებს შეძლებოდათ იმ დანაყოფების გადაყვანა, რომლებმაც მადუროს პოზიციებზე იერიში მიიტანეს“.

თეთრი სახლისა და პენტაგონის მხრიდან მსხვერპლის ან ოპერაციის სრული მასშტაბის შესახებ ოფიციალური დადასტურება დაუყოვნებლივ არ გაკეთებულა.

შაბათს დილით აშშ-ის ძალებმა მადურო და მისი მეუღლე, სილია ფლორესი დააკავეს და ვენესუელიდან გაიყვანეს; აშშ-ის პრეზიდენტმა დონალდ ტრამპმა ამას „დრამატული ღამის ოპერაცია“ უწოდა.

ტრამპმა განაცხადა, რომ შეერთებული შტატები ვენესუელას იქამდე მართავს, სანამ „უსაფრთხო, სათანადო და გონივრული გარდამავალი პერიოდი“ არ იქნება უზრუნველყოფილი.

ნიუ-იორკის სამხრეთ ოლქის ფედერალურმა პროკურორებმა შაბათს დილით გამოაქვეყნეს საბრალდებო დასკვნა, რომლის მიხედვითაც მადუროსა და ფლორესს ბრალად ედებათ აშშ-ში „ტონობით კოკაინის“ შეტანა და სხვა სავარაუდო დანაშაულები.

ზოგიერთი ექსპერტი, რომელიც ოპერაციას კრიტიკულად უყურებს, აცხადებს, რომ თავდასხმები არღვევს საერთაშორისო სამართალს, გვერდს უვლის კონგრესს და ვენესუელასა თუ მთლიანად რეგიონში კიდევ უფრო მეტი დესტაბილიზაციის რისკს შეიცავს.