რუსეთის პრეზიდენტმა პუტინმა და ინდოეთის პრემიერ-მინისტრმა ნარენდრა მოდიმ პარასკევს ნიუ-დელიში სამიტის ფარგლებში მოლაპარაკებები დაიწყეს. სანამ ნიუ-დელი რუს ლიდერს წითელ ხალიჩას უგებდა, მოდიმ განაცხადა, რომ ინდოეთი მხარს უჭერს უკრაინაში სამშვიდობო ძალისხმევას.
პუტინი, რომელიც ოთხი წლის განმავლობაში პირველად ეწვია ინდოეთს, მიზნად ისახავს ვაჭრობის გააქტიურებას რუსული იარაღისა და საზღვაო ნავთობის უმსხვილეს მყიდველთან იმ ფონზე, როდესაც დასავლურმა სანქციებმა მათ მრავალწლიან ურთიერთობებს პრობლემები შეუქმნა.
ვიზიტი ემთხვევა პერიოდს, როდესაც ნიუ-დელი აშშ-სთან სავაჭრო შეთანხმებაზე მოლაპარაკებებს აწარმოებს, რათა შეამციროს ის საჯარიმო ტარიფები, რომლებიც პრეზიდენტმა დონალდ ტრამპმა მის პროდუქციას რუსეთიდან ნავთობის შესყიდვის გამო დაუწესა.
მოსკოვი ათწლეულების განმავლობაში ინდოეთის იარაღის უმსხვილესი მიმწოდებელი იყო და აცხადებს, რომ სურს მეტი ინდური საქონლის იმპორტი, რათა 2030 წლისთვის ვაჭრობა 100 მილიარდ დოლარამდე გაზარდოს; დღემდე ვაჭრობა, ნიუ-დელის მიერ ენერგორესურსების იმპორტის გამო, არაბალანსირებული იყო და რუსეთის სასარგებლოდ იხრებოდა.
მას შემდეგ, რაც დაახლოებით ოთხი წლის წინ რუსეთი უკრაინას დაესხა თავს და ევროპულმა ქვეყნებმა რუსულ ენერგორესურსებზე დამოკიდებულება შეამცირეს, ინდოეთმა გაზარდა ფასდაკლებული რუსული ნედლი ნავთობის შესყიდვები; თუმცა წელს, აშშ-ის ტარიფებისა და სანქციების ზეწოლის გამო, შესყიდვები შეამცირა.
„ინდოეთი ნეიტრალური არ არის“
მოლაპარაკებების დაწყებისას მოდიმ პუტინს განუცხადა: „ინდოეთი ნეიტრალური არ არის — ინდოეთს აქვს პოზიცია და ეს პოზიცია მშვიდობისკენაა მიმართული. ჩვენ მხარს ვუჭერთ მშვიდობისთვის გაწეულ ნებისმიერ ძალისხმევას და მხარში ვუდგავართ მშვიდობისთვის გადადგმულ ნებისმიერ ნაბიჯს.“
პუტინმა, საპასუხოდ, მოდის მადლობა გადაუხადა კონფლიქტის მოგვარებისკენ მიმართული ინტერესისა და ძალისხმევისთვის.
„გვქონდა შესაძლებლობა — და თქვენ მომეცით ეს შესაძლებლობა — დეტალურად გვესაუბრა იმაზე, თუ რა ხდება უკრაინის მიმართულებით და იმ ნაბიჯებზე, რომლებსაც სხვა პარტნიორებთან, მათ შორის შეერთებულ შტატებთან ერთად ვდგამთ ამ კრიზისის შესაძლო მშვიდობიანი მოგვარებისთვის,“ - განაცხადა პუტინმა. „ჩვენი ქვეყნებისა და ეკონომიკების ზრდასთან ერთად ფართოვდება თანამშრომლობის შესაძლებლობებიც. ჩნდება ახალი სფეროები — ერთობლივი მუშაობა მაღალ ტექნოლოგიებში, ავიაციაში, კოსმოსსა და ხელოვნურ ინტელექტში. სამხედრო-ტექნიკური თანამშრომლობის სფეროში ძალიან სანდო ურთიერთობა გვაქვს და მიზნად ვისახავთ წინსვლას ყველა ამ მიმართულებით.“
პუტინი ხუთშაბათს ჩავიდა ნიუ-დელიში; მას აეროპორტის ბაქანზე მოდი თბილად დახვდა და გადაეხვია. მოგვიანებით ორივე ლიდერი ერთი ავტომობილით გაემგზავრა კერძო ვახშამზე, რომელსაც მოდი მასპინძლობდა.
პარასკევს, როდესაც პუტინის კორტეჟი კოლონიური პერიოდის საპრეზიდენტო სასახლის, „რაშტრაპატი ბჰავანის“ წინა ეზოში შევიდა, მას 21 ზარბაზნის გასროლით, საზეიმოდ დახვდნენ.
მოსალოდნელია, რომ ოფიციალური მოლაპარაკებების დასასრულს მხარეები არაერთ შეთანხმებას გამოაცხადებენ.
მედიის ცნობით, მოსალოდნელია, რომ ინდური კომპანიები ხელს მოაწერენ შეთანხმებას კალიუმისა და ამონიუმის ნიტრატის წამყვან რუსულ მწარმოებელ ჯგუფ „ურალქიმთან“ რუსეთში შარდოვანას ერთობლივი საწარმოს ასაშენებლად.
რუსულმა ბანკებმა, „გაზპრომბანკმა“ და „ალფა ბანკმა“, ასევე მოითხოვეს ნებართვა ინდოეთში ოპერირებისთვის, რათა ხელი შეუწყონ მოსკოვის ვაჭრობის ზრდას ინდოეთთან.
პუტინმა ინდოეთს საწვავის „შეუწყვეტელი“ მიწოდება შესთავაზა
პარასკევს პუტინმა განაცხადა, რომ აშშ-ის ძლიერი ზეწოლის მიუხედავად, რომ ნიუ-დელიმ შეწყვიტოს ნავთობის ყიდვა მოსკოვისგან, ისინი ინდოეთს „შეუწყვეტელ მიწოდებას“ გაუგრძელებენ.
„რუსეთი არის ნავთობის, გაზის, ნახშირისა და ინდოეთის ენერგეტიკული განვითარებისთვის საჭირო ყველა რესურსის საიმედო მომწოდებელი,“ - უთხრა პუტინმა მოდის. „ჩვენ მზად ვართ გავაგრძელოთ საწვავის შეუწყვეტელი მიწოდება სწრაფად მზარდი ინდური ეკონომიკისთვის“.
ხუთშაბათს ღამით გამოქვეყნებულ ინტერვიუში ტელეკომპანია India Today-სთან, პუტინმა კითხვის ნიშნის ქვეშ დააყენა აშშ-ის ზეწოლა ინდოეთზე, არ იყიდოს რუსული საწვავი, მაშინ როცა აშშ თავად ყიდულობს რუსულ ბირთვულ საწვავს.
„თუ აშშ-ს აქვს უფლება შეიძინოს ჩვენი საწვავი, რატომ არ უნდა ჰქონდეს იგივე პრივილეგია ინდოეთს? ეს კითხვა იმსახურებს საფუძვლიან განხილვას და ჩვენ მზად ვართ ეს განვიხილოთ, მათ შორის პრეზიდენტ ტრამპთანაც,“ - თქვა პუტინმა.
პუტინმა ასევე აღნიშნა, რომ მიუხედავად ინდოეთ-რუსეთის ვაჭრობის მცირედი კლებისა წლის პირველ ცხრა თვეში, ენერგეტიკული ვაჭრობა „შეუფერხებლად მიმდინარეობს“.
ინდოეთმა განაცხადა, რომ ტრამპის ტარიფები უსამართლო და არალოგიკურია და მიუთითა აშშ-ის მიმდინარე ვაჭრობაზე მოსკოვთან. აშშ და ევროკავშირი აგრძელებენ მილიარდობით დოლარის ღირებულების რუსული ენერგორესურსებისა და ნედლეულის იმპორტს, დაწყებული თხევადი ბუნებრივი აირიდან, დამთავრებული გამდიდრებული ურანით.
მოსალოდნელია, რომ მოდი და პუტინი ასევე განიხილავენ ისეთ საკითხებს, როგორიცაა მუშახელი და სამოქალაქო ბირთვული ენერგია.
ვიზიტის ფარგლებში პუტინს თან ახლდა დიდი სავაჭრო და სამთავრობო დელეგაცია; დელეგაციაში ასევე იმყოფებოდა თავდაცვის მინისტრი ანდრეი ბელოუსოვი, რომელმაც ხუთშაბათს მოლაპარაკებები გამართა თავის ინდოელ კოლეგასთან, რაჯნათ სინგჰთან.
მოლაპარაკებების შემდეგ ინდოეთის თავდაცვის სამინისტრომ გაავრცელა ბელოუსოვის სიტყვები: „რუსეთის თავდაცვის ინდუსტრია მზადაა მხარი დაუჭიროს ინდოეთს, რათა ის თავდაცვის წარმოებაში თვითკმარი ქვეყანა გახდეს“.
