პრეზიდენტმა რეჯეფ თაიფ ერდოღანმა „ეფეს-2026“-ის სამხედრო სწავლებაზე გამოსვლისას აღნიშნა, რომ მოხარულია იზმირში ყოფნით „ეფეს-2026“-ის სწავლების „საპატიო დამკვირვებლის დღესთან“ დაკავშირებით, რომელიც არის „არა მხოლოდ თურქეთის, არამედ მსოფლიოს ერთ-ერთი წამყვანი გაერთიანებული, ერთობლივი და ყოვლისმომცველი სწავლება“. მან განაცხადა, რომ წლევანდელ წვრთნებში თურქ ჯარისკაცებთან ერთად 50 სხვადასხვა ქვეყნის 1300-ზე მეტი მეგობარი, მოძმე და მოკავშირე პერსონალი მონაწილეობს.

პრეზიდენტმა ყურადღება გაამახვილა სწავლებაში გამოყენებულ ადგილობრივ თავდაცვით პროდუქტებზე და განაცხადა: „მაღალტექნოლოგიური, ადგილობრივი და ეროვნული თავდაცვის ინდუსტრიის პროდუქტების წარმატებით გამოყენებით; მისი დაგეგმვით, განხორციელებით, დანაყოფების ჰარმონიულობით, შინაარსითა და გზავნილით - და ყოველივე ამის უკან მდგომი სტრატეგიული გონებით - „ეფესის“ სწავლება ბევრად უფრო მეტს ნიშნავს, ვიდრე უბრალოდ წვრთნა. აქ არის იმის მაგალითი, თუ რაოდენ დიდ მომზადებას, ნებასა და გადაწყვეტილებას მოითხოვს მშვიდობის დამყარება, შეკავების (დეტერენციის) გარდა.“

ერდოღანმა აღნიშნა, რომ დღეს მსოფლიოში ახალი ბალანსი და ალიანსები ყალიბდება, „თუმცა გლობალური მასშტაბით ახალი წესრიგის დამყარება ვერ მოხერხდა“. პრეზიდენტმა თქვა: „ჩვენი მსოფლიო სწრაფად გადადის იმ სტატუს-კვოდან, რომელსაც რამდენიმე დიდი ძალა (რომელთა რაოდენობა ერთი ხელის თითებზე ჩამოითვლება) აფორმებდა, მრავალპოლარულ და მრავალაქტორიან სტრუქტურაზე“.

„ჩვენ ვაცნობიერებთ, რომ ამ რთულ გეოგრაფიაში ჩვენი მშვიდობისა და უსაფრთხოების დასაცავად ჯარი ძლიერი და აღჭურვილი უნდა გვყავდეს“, - განაცხადა ერდოღანმა და თურქეთის რეგიონულ როლზე შემდეგი სიტყვებით გაამახვილა ყურადღება: „ჩვენ, როგორც თურქეთი, კვლავაც დავიცავთ მშვიდობასა და სტაბილურობას მათ წინააღმდეგ, ვინც ინვესტიციას ომსა და ქაოსში დებს. ჩვენ მტკიცედ განვაგრძობთ კაცობრიობის საერთო ღირებულებების დაცვას იმ გენოციდის ქსელების წინააღმდეგ, რომლებიც ღაზაში, ლიბანში და ჩვენი რეგიონის სხვა ადგილებში ხოცავენ ბავშვებს, ქალებსა და მოხუცებს“.