ირანის მიერ ისრაელის სამხრეთში ორ ქალაქზე განხორციელებული სარაკეტო თავდასხმების შედეგად 100-ზე მეტი ადამიანი დაშავდა. თავდასხმების შემდეგ, რომელთა დროსაც ისრაელის საჰაერო თავდაცვის სისტემებმა რაკეტების მოგერიება ვერ შეძლეს, ნეთანიაჰუმ ღამეს „ძალიან რთული“ უწოდა.

ორმა პირდაპირმა მოხვედრამ საცხოვრებელი სახლების ფასადები დააზიანა და მიწაში დიდი ღრმულები წარმოქმნა.

სასწრაფო დახმარების სამსახურმა „მაგენ დავიდ ადომმა“ განაცხადა, რომ ქალაქ არადში 84 ადამიანი დაშავდა, მათგან 10 მძიმედ, ხოლო რამდენიმე საათით ადრე მეზობელ დიმონაში 33 პირი დაშავდა.

ირანის სახელმწიფო ტელევიზიამ გაავრცელა ინფორმაცია, რომ თავდასხმა დიმონაზე, სადაც ბირთვული ობიექტი მდებარეობს, იყო „პასუხი“ მანამდე ნათანზის ირანულ ბირთვულ ობიექტზე განხორციელებულ თავდასხმაზე.

შემთხვევის ადგილზე მრავალი სახანძრო მანქანა და საგანგებო სიტუაციების ჯგუფი იქნა გაგზავნილი.

ნეთანიაჰუმ თავის განცხადებაში ღამეს „ძალიან რთული“ უწოდა და აღნიშნა, რომ ისრაელი გააგრძელებს თავდასხმებს ირანზე. მან დასძინა, რომ ქვეყანა „მტკიცედ აგრძელებს შეტევებს მტრების წინააღმდეგ ყველა ფრონტზე“.

საჰაერო თავდაცვის სისტემას შეისწავლიან

სახანძრო სამსახურის წარმომადგენლებმა განაცხადეს, რომ დიმონასა და არადში გაშვებულმა საჰაერო თავდაცვის რაკეტებმა მიზანს ვერ მიაღწიეს, რის შედეგადაც ასეულობით კილოგრამიანი საბრძოლო ქობინის მქონე ბალისტიკურმა რაკეტებმა ორი პირდაპირი დარტყმა განახორციელეს.

ისრაელის არმიამ განაცხადა, რომ მომხდარს შეისწავლიან. არმიის სპიკერმა, ბრიგადის გენერალმა ეფი დეფრინმა აღნიშნა, რომ საჰაერო თავდაცვის სისტემები ჩართული იყო, თუმცა რაკეტების შეჩერება ვერ მოხერხდა და მომხდარიდან შესაბამის დასკვნებს გამოიტანენ.

ადგილობრივმა სახანძრო სამსახურმა განაცხადა, რომ არადში სამი შენობა დაზიანდა, ერთ-ერთში კი ხანძარი გაჩნდა.

შიდა ფრონტის სარდლობამ გასცა განკარგულება, რომ რეგიონში სკოლებმა სწავლა ონლაინ რეჟიმში გააგრძელონ.

მედიკოსმა რიად აბუ აჯაჯმა განაცხადა, რომ თავდასხმის ზონაში მასშტაბური ნგრევა და ძლიერი ქაოსია.