აღმოსავლეთ შავიზღვისპირეთის ექსპორტიორთა ასოციაციის დირექტორთა საბჭოს თავმჯდომარემ, სელჩუკ ისკენდერმა, წერილობით განცხადებაში აღნიშნა, რომ წლის პირველ ხუთ თვეში ტრაბზონიდან 625 მილიონ 282 ათასი, რიზედან - 101 მილიონ 145 ათასი, გუმუშჰანედან - 65 მილიონ 290 ათასი, ხოლო ართვინიდან - 39 მილიონ 451 ათასი დოლარის ექსპორტი განხორციელდა.

ისკენდერმა ხაზგასმით აღნიშნა, რომ გასული წლის იმავე პერიოდთან შედარებით, ექსპორტი ტრაბზონში 12%-ით, რიზეში 31%-ით, გუმუშჰანეში 76%-ით, ხოლო ართვინში 26%-ით გაიზარდა.

მან მიუთითა, რომ საექსპორტო სექტორებს შორის 437 მილიონ 615 ათასი დოლარით პირველ ადგილზე თხილია. მას მოჰყვება სხვადასხვა მეტალები (135 მილიონ 466 ათასი დოლარი), ზღვისა და მეცხოველეობის პროდუქტები (88 მილიონ 278 ათასი დოლარი) და ახალი ხილი და ბოსტნეული (67 მილიონ 758 ათასი დოლარი).

ისკენდერის განცხადებით, აღნიშნულ პერიოდში აღმოსავლეთ შავიზღვისპირეთიდან გაყიდვები 115 ქვეყანაში განხორციელდა. ხუთი წამყვანი ქვეყანა, სადაც ყველაზე მეტი ექსპორტი განხორციელდა, არის: იტალია, გერმანია, რუსეთი, საქართველო და საფრანგეთი.

მან ასევე აღნიშნა, რომ ექსპორტის ყველაზე დიდი ზრდა - 96% - გერმანიის მიმართულებით დაფიქსირდა. ისკენდერმა ყურადღება გაამახვილა იმ ფაქტზეც, რომ გასული წლის ანალოგიური პერიოდისგან განსხვავებით, ექსპორტი კიდევ 13 ახალ ქვეყანაში განხორციელდა, მათ შორის: ფილიპინებში, ინდონეზიაში, ელ-სალვადორში, არგენტინასა და სუდანში.