აშშ-ის პრეზიდენტმა დონალდ ტრამპმა ამერიკული საჰაერო თავდაცვის რაკეტების მარაგების შემცირებასთან დაკავშირებული შეშფოთების გამო, ირანის წინააღმდეგ სამხედრო ოპერაციების მასშტაბური ესკალაციის გეგმები შეაჩერა.

The New York Times-ის ინფორმაციით, გადაწყვეტილება ტრამპის მიერ პარასკევს მაღალი რანგის მრჩევლებთან და კაბინეტის წევრებთან გამართული შეხვედრის შემდეგ იქნა მიღებული.

აღინიშნა, რომ სამხედრო მაღალჩინოსნებმა გააფრთხილეს, რომ ფართომასშტაბიანი კონფლიქტების განახლებამ შესაძლოა სახიფათოდ შეამციროს Patriot-ის ტიპის ჩამჭრელი რაკეტები და სხვა საჰაერო თავდაცვის საბრძოლო მასალა, რომელიც ახლო აღმოსავლეთში ამერიკელი ჯარისკაცებისა და ბაზების დასაცავად არის საჭირო. მანამდეც არსებობდა შეშფოთება იმის შესახებ, რომ აშშ-მა ირანთან მიმდინარე დაპირისპირებებში საჰაერო თავდაცვის რაკეტების მარაგების მნიშვნელოვანი ნაწილი გამოიყენა.

სტატიაში აღნიშნულია, რომ ტრამპის ადმინისტრაცია ასევე შეშფოთებულია იმით, რომ შემდგომმა ესკალაციამ შესაძლოა გამოიწვიოს ირანის უფრო მკაცრი საპასუხო ზომები, დააშოროს ყურის ქვეყნები აშშ-ს და გაამწვავოს გლობალური ენერგეტიკული და ლტოლვილთა კრიზისები.

დიპლომატიური ბარიერები

გავრცელებული ინფორმაციით, აშშ-ის შეიარაღებული ძალების გაერთიანებული შტაბის უფროსმა, გენერალმა დენ კეინმა კერძო საუბრებში განაცხადა, რომ ფართომასშტაბიანი სამხედრო ოპერაციების განახლება შესაძლებელია, თუმცა ეს მნიშვნელოვნად შეამცირებს ჩამჭრელი რაკეტების მარაგებს, რომლებიც აშშ-ის ცენტრალური სარდლობის განკარგულებაშია ახლო აღმოსავლეთში სამხედრო საქმიანობის სამართავად.

თეთრი სახლის კომუნიკაციების დირექტორმა, სტივენ ჩუნგმა განაცხადა, რომ ტრამპი ყოველთვის ღიად გამოხატავდა დიპლომატიური გადაწყვეტის უპირატესობას, თუმცა, იმ შემთხვევაში, თუ ირანი გააგრძელებს „ტერორისტულ საქმიანობას“ ჰორმუზის სრუტეში ან აშშ-ის მოკავშირეების წინააღმდეგ, ყველა ვარიანტი კვლავ განსახილველი რჩება.

„ირანისთვის გონივრული იქნებოდა მოლაპარაკებების გზით მიღწეულ შეთანხმებაზე მუშაობა. წინააღმდეგ შემთხვევაში, მათ იციან, რაც მოხდება“, - აღნიშნა ჩუნგმა.