მსოფლიოს უმდიდრესმა ადამიანმა და დონალდ ტრამპის ყოფილმა მრჩეველმა, ილონ მასკმა, გასულ კვირას აშშ-ის პრეზიდენტთან მომხდარი დაპირისპირების შემდეგ განაცხადა, რომ ტრამპის მიმართ გამოთქმული ზოგიერთი კრიტიკის გამო სინანულს გამოთქვამს.
ოთხშაბათს, საკუთარ სოციალური მედიის პლატფორმა X-ზე გამოქვეყნებულ პოსტში მასკმა დაწერა: „ვწუხვარ გასულ კვირას პრეზიდენტ @realDonaldTrump-ის შესახებ გაკეთებული ზოგიერთი პოსტის გამო. ცოტა შორს შევტოპე“.
მასკმა ეს განცხადება მას შემდეგ გააკეთა, რაც ტრამპი ტექნოლოგიურ მილიარდერს „სერიოზული შედეგებით“ დაემუქრა იმ შემთხვევაში, თუ ის ხარჯების შესახებ სადავო კანონპროექტისთვის ხმის მიმცემი რესპუბლიკელების დასჯას შეეცდებოდა.
გასული კვირის ხუთშაბათიდან სოციალურ მედიაში მიმდინარე ეს მწვავე დაპირისპირება მას შემდეგ დაიწყო, რაც მასკმა მკაცრად გააკრიტიკა ხარჯების კანონპროექტი, რომელსაც ტრამპმა „დიდი და ლამაზი“ უწოდა. აღნიშნული კანონპროექტი ამჟამად კონგრესის განხილვის პროცესშია.
კანონპროექტის მოწინააღმდეგე ზოგიერთმა კანონმდებელმა მასკს, რომელიც გასული წლის საპრეზიდენტო არჩევნებში რესპუბლიკური პარტიის ერთ-ერთი უმსხვილესი ფინანსური მხარდამჭერი იყო, სთხოვა, მხარი დაეჭირა იმ რესპუბლიკელების კონკურენტი კანდიდატებისთვის, რომლებმაც კანონპროექტს მისცეს ხმა.
„თუ ის ამას გააკეთებს, ძალიან სერიოზული შედეგები მოჰყვება“, - განაცხადა ტრამპმა შაბათს NBC News-თან საუბარში და მასკს „უპატივცემულო“ უწოდა. ტრამპს არ დაუკონკრეტებია, თუ რა შედეგებს გულისხმობდა.
ტრამპმა ასევე განაცხადა, რომ არ სურს სამხრეთ აფრიკაში დაბადებულ მასკთან, რომელიც კომპანიების Tesla და SpaceX-ის აღმასრულებელი დირექტორია, ურთიერთობის აღდგენა და მასთან საუბარს არ აპირებს.
ოთხშაბათს გამოქვეყნებულ პოსტში მასკს არ დაუკონკრეტებია, ტრამპის მიმართ გამოთქმული რომელი კრიტიკა იყო „ზედმეტად შორს წასული“.
„ხარჯების კანონპროექტის“ კრიზისი
როგორც ჩანდა, ყოფილმა მოკავშირეებმა ურთიერთობა დაახლოებით ორი კვირის წინ მეგობრულად დაასრულეს. ტრამპი დადებითად შეხვდა მასკის წასვლას მთავრობის ეფექტიანობის დეპარტამენტში (DOGE) ხარჯების შემცირების მისიიდან.
თუმცა, მათ შორის ურთიერთობა რამდენიმე დღეში გაფუჭდა, როდესაც მასკმა ხარჯების კანონპროექტი „ამაზრზენად“ შეაფასა და განაცხადა, რომ კონგრესის მიერ მისი მიღების შემთხვევაში, ეს ტრამპის მეორე საპრეზიდენტო ვადაზე დაღს დაასვამდა.
დაპირისპირება იმდენად გაიზარდა, რომ ვაშინგტონი გააოცა, როდესაც ტრამპმა ოვალურ კაბინეტში სიტყვით გამოსვლისას მასკის კომენტარებს მკაცრად უპასუხა.
„ნახეთ, მე ილონთან შესანიშნავი ურთიერთობა მქონდა. არ ვიცი, გაგრძელდება თუ არა ეს ურთიერთობა. გაკვირვებული ვარ“, - განუცხადა ტრამპმა ჟურნალისტებს.
მასკმა, რომელიც ტრამპის 2024 წლის საარჩევნო კამპანიის უმსხვილესი დონორია, რესპუბლიკელების არჩევნებში გამარჯვების საკითხიც წამოჭრა.
„მე რომ არა, ტრამპი არჩევნებს წააგებდა, დემოკრატები წარმომადგენელთა პალატას გააკონტროლებდნენ და რესპუბლიკელები სენატში 51-49 იქნებოდნენ. აი, ასეთი უმადურობაა“, - დაწერა მან.
მოგვიანებით ტრამპმა პლატფორმა Truth Social-ზე განაცხადა, რომ აშშ-ის მთავრობისთვის ფულის დაზოგვის „ყველაზე მარტივი გზა“ მასკის კომპანიებისთვის გაცემული მილიარდობით დოლარის სუბსიდიებისა და კონტრაქტების შეწყვეტა იქნებოდა. აშშ-ის მედიის ცნობით, ამ კონტრაქტების ღირებულება 18 მილიარდი დოლარია.
იმ ფონზე, როდესაც ამ უთანხმოებას რეალური პოლიტიკური და ეკონომიკური რისკების შექმნა შეეძლო, ორივე მხარემ პარასკევს, როგორც ჩანს, უკან დაიხია. ტრამპმა ჟურნალისტებს უთხრა: „მე მას მხოლოდ საუკეთესოს ვუსურვებ“, რაზეც მასკმა X-ზე უპასუხა: „მეც ასევე“.
ეპშტეინის ბრალდებებთან დაკავშირებული პოსტების წაშლა
შეინიშნა, რომ მასკმა დაპირისპირების დროს წაშალა პოსტი, რომელშიც პრეზიდენტს დისკრედიტებულ ფინანსისტ ჯეფრი ეპშტეინთან აკავშირებდა. ამ მოვლენის შემდეგ ტრამპი NBC-ის ესაუბრა.
მასკი ამტკიცებდა, რომ რესპუბლიკელი პრეზიდენტის სახელი ეპშტეინის ყოფილ პარტნიორებთან დაკავშირებულ, გამოუქვეყნებელ სამთავრობო დოკუმენტებში ფიგურირებდა. ეპშტეინმა, რომელსაც ადამიანებით ვაჭრობის (ტრეფიკინგის) ბრალდებები ჰქონდა წაყენებული, 2019 წელს თავი მოიკლა.
ტრამპი ერთ-ერთი იყო იმ პირთა შორის, რომელთა სახელებიც ეპშტეინთან დაკავშირებულ ჩვენებებსა და დოკუმენტებში გამოჩნდა, რომლებიც 2024 წლის დასაწყისში ნიუ-იორკელმა მოსამართლემ გაასაჯაროვა. თუმცა, აღნიშნულ საქმეში ტრამპის მიმართ რაიმე ბრალდება არ წაყენებულა.
მასკმა X-ზე დაწერა: „დროა, ნამდვილი დიდი ბომბი ავაფეთქოთ: (ტრამპის სახელი) ეპშტეინის დოკუმენტებშია. ეს არის ნამდვილი მიზეზი, თუ რატომ არ ხდება ამ დოკუმენტების გასაჯაროება“.
მასკს არ დაუკონკრეტებია, რომელ დოკუმენტებზე საუბრობდა და მისი მტკიცებულებისთვის რაიმე საბუთი არ წარუდგენია. მილიარდერმა ამ თემაზე გამოქვეყნებული პოსტები შაბათს დილით წაშალა.
