ამერიკის შეერთებული შტატების პრეზიდენტმა დონალდ ტრამპმა განაცხადა, რომ მალე ჰორმუზის სრუტეს აშშ-ის ტერიტორიად გამოაცხადებს, რაზეც ირანის მთავრობამ საპასუხოდ აღნიშნა, რომ აშშ-ის მუქარის არ ეშინია.
პარასკევს, ნიუ-იორკის შტატის ქალაქ გარდენ-სიტიში მდებარე ნასოს ოლქის ახალ პოლიციის აკადემიაში გამოსვლისას ტრამპმა განაცხადა: „მას შემდეგ, რაც ირანს, რომელიც ახლა მძიმე მარცხს განიცდის, სრულად დავამარცხებთ, ძალიან მალე ჰორმუზის სრუტეს აშშ-ის ტერიტორიად გამოვაცხადებ“.
ტრამპმა ასევე აღნიშნა, რომ ამ სტრატეგიულ საზღვაო გზაზე აშშ-ის ბლოკადა გრძელდება და დასძინა: „ჩვენი ნებართვის გარეშე ვერცერთი გემი ვერ გაივლის“.
ირანის ხელმძღვანელობის ომის გამო მნიშვნელოვან დასუსტებაზე საუბრისას ტრამპმა თქვა: „ამჟამად ჩემი ერთ-ერთი პრობლემა ეს არის: მოლაპარაკებების საწარმოებლად აღარავინ დარჩა. ეს პრობლემაა. ვთქვი: ‘დარწმუნებული ხართ, რომ ამ კაცს ჭკუა ეკითხება?’ ეს მსოფლიოში ერთადერთი ქვეყანაა, სადაც პრეზიდენტობა არავის სურს“.
ომთან დაკავშირებით ბენზინის გაძვირების თაობაზე აშშ-ის პრეზიდენტმა განაცხადა: „თუ ბენზინში ცოტათი მეტს იხდით, გახსოვდეთ, რომ ამას აკეთებთ იმის უზრუნველსაყოფად, რომ ძალიან ცუდმა ქვეყანამ — მსოფლიოში ტერორიზმის ნომერ პირველმა სპონსორმა სახელმწიფომ — ბირთვული იარაღი არ მოიპოვოს“.
თუმცა ირანელმა სამხედრო მაღალჩინოსნებმა უარყვეს აშშ-ის პრეტენზიები საზღვაო გზის კონტროლთან დაკავშირებით; ირანის ცენტრალურმა სამხედრო სარდლობამ ხუთშაბათს ამ განცხადებებს „უსაფუძვლო სიცრუე და გამონაგონი“ უწოდა.
ირანმა ტრამპის განცხადებას უპასუხა
ტრამპის პარასკევის განცხადებების საპასუხოდ, ირანის საგარეო საქმეთა მინისტრის მოადგილემ, ქაზიმ ღარიბაბადიმ განაცხადა, რომ თეირანს ვაშინგტონის მუქარისა თუ ძალის დემონსტრირების არ ეშინია.
ღარიბაბადიმ პლატფორმა X-ზე გამოქვეყნებულ პოსტში აღნიშნა, რომ სტრატეგიული მნიშვნელობის ჰორმუზის სრუტის გახსნა ან ჩაკეტვა მხოლოდ ირანის იურისდიქციაში შედის.
CNN-ის ცნობით, სასაქონლო და საზღვაო გადაზიდვების მონაცემთა ანალიტიკური კომპანია Kpler-ის მონაცემები აჩვენებს, რომ 12 აგვისტოს მდგომარეობით, ომის დაწყებიდან გასული 166 დღის განმავლობაში სრუტე 3 371-მა გემმა გადაკვეთა. ეს მაჩვენებელი ომამდელი მოძრაობის მოცულობის დაახლოებით 20 პროცენტს შეადგენს.
აშშ და ირანი აპრილში პაკისტანის შუამავლობით ცეცხლის შეწყვეტაზე შეთანხმდნენ, მოგვიანებით კი, 17 ივნისს, ურთიერთგაგების მემორანდუმის ხელმოწერით დაიწყეს მოლაპარაკებები საბოლოო შეთანხმების მისაღწევად.
თუმცა მოლაპარაკებები მოგვიანებით ჩიხში შევიდა უსაფრთხოების გარანტიებსა და ნაოსნობის თავისუფლებასთან დაკავშირებული უთანხმოების გამო ჰორმუზის სრუტეში, რომელიც გლობალური ენერგომომარაგებისა და ვაჭრობისთვის მსოფლიოში ერთ-ერთ ყველაზე სტრატეგიულ მარშრუტს წარმოადგენს.
8-24 ივლისს აშშ-სა და ირანს შორის სამხედრო დარტყმები გაგრძელდა; ვაშინგტონმა ირანის ტერიტორიაზე იერიშები მიიტანა.
საპასუხოდ თეირანმა დაარტყა სამიზნეებს სხვადასხვა არაბულ ქვეყანაში, მათ შორის იორდანიაში, ბაჰრეინსა და ქუვეითში, რომლებიც აშშ-ის სამხედრო ობიექტებად და აღჭურვილობად დაასახელა.
