ირანის არმიის სარდალმა, გენერალ-მაიორმა ამირ ჰათემიმ მკაცრი გაფრთხილება გაავრცელა „გადამწყვეტი და სინანულის მომგვრელი“ საპასუხო დარტყმის შესახებ, რაც მოჰყვება უშიშროების საბჭოს თავმჯდომარის, ალი ლარიჯანის მკვლელობას ისრაელის საჰაერო თავდასხმის შედეგად.
ოთხშაბათს გაკეთებულ განცხადებაში ჰათემიმ აღნიშნა: „ირანის რეაქცია ეროვნული უშიშროების უმაღლესი საბჭოს მდივნის მკვლელობაზე იქნება გადამწყვეტი და სინანულის მომგვრელი“.
ირანის რევოლუციის გუშაგთა კორპუსმა - არმიისგან განცალკევებულმა მძლავრმა სამხედრო ძალამ - ოთხშაბათს განაცხადა, რომ „მოწამეობრივად დაღუპული დოქტორ ალი ლარიჯანისა და მისი თანმხლები პირების სისხლის ასაღებად“ ისრაელის ცენტრალური ნაწილის მიმართულებით რაკეტები გაუშვა.
ირანის ეროვნული უშიშროების უმაღლესმა საბჭომ მანამდე დაადასტურა ლარიჯანის მკვლელობის ფაქტი. ეს დადასტურება მოჰყვა ისრაელის განცხადებას, რომ იგი საჰაერო იერიშის შედეგად იქნა მოკლული და თავდასხმას ასევე მისი ვაჟისა და მცველების სიცოცხლე ემსხვერპლა.
ლარიჯანი ირანის პოლიტიკაში გავლენიანი ფიგურა იყო და ბოლო ორმოცი წლის განმავლობაში სხვადასხვა მაღალი თანამდებობა ეკავა, მათ შორის სახელმწიფო მედიაში, უსაფრთხოების უწყებებსა და პარლამენტში.
1957 წლის 3 ივნისს ერაყის ქალაქ ნეჯეფში დაბადებულმა ლარიჯანიმ ბაკალავრის ხარისხი კომპიუტერულ მეცნიერებებში შარიფის ტექნოლოგიურ უნივერსიტეტში მიიღო, ხოლო მაგისტრის და დოქტორის ხარისხები ფილოსოფიის დარგში თეირანის უნივერსიტეტში მოიპოვა.
