პრეზიდენტმა ერდოღანმა განაცხადა: „ამ პერიოდში, როდესაც ჩვენი რეგიონი ომებისა და კრიზისების სერიას ებრძვის, თურქეთი თავისი ეკონომიკით, ინფრასტრუქტურით, გამოცდილი ინსტიტუტებით, კვალიფიციური კადრებით და რაც ყველაზე მთავარია, განმტკიცებული შიდა ფრონტით, სტაბილურობის კუნძულად გვევლინება“.

თურქეთის პრეზიდენტმა რეჯეფ თაიფ ერდოღანმა ყურბან-ბაირამის დღესასწაულთან დაკავშირებით ვიდეომიმართვა გაავრცელა.

„გულწრფელად ვუსურვებ, რომ ამ წმინდა დღეებმა სიკეთე მოუტანოს ჩვენს ქვეყანას, ჩვენს ძვირფას ერს, ისლამურ სამყაროსა და მთელ კაცობრიობას“, - აღნიშნა პრეზიდენტმა თავის განცხადებაში, სადაც ასევე შეეხო დღის წესრიგში არსებულ არაერთ მნიშვნელოვან საკითხს.

ერდოღანმა რეგიონში არსებული კონფლიქტების გავლენაზე შემდეგი განაცხადა: „მაშინ, როცა ისლამური სამყარო მშვიდობის ატმოსფეროთი ხარობს, მეორე მხრივ, ჩვენი რეგიონი და მსოფლიო მაღალი დაძაბულობის პერიოდს გადის. ისრაელი, ცეცხლის შეწყვეტის მიუხედავად, თავხედურად აგრძელებს ოკუპაციას, ნგრევას, ხოცვა-ჟლეტასა და უკანონო დასახლებების მშენებლობას ჩვენი გეოგრაფიის სხვადასხვა წერტილში - ღაზიდან დასავლეთ სანაპირომდე, აღმოსავლეთ იერუსალიმიდან ლიბანამდე. ისრაელის პროვოკაციებითა და ინტრიგებით გამოწვეული ომის უარყოფითი შედეგები იგრძნობა მრავალ სფეროში: ენერგეტიკიდან სოფლის მეურნეობამდე, ვაჭრობიდან ტრანსპორტამდე, ეკონომიკიდან უსაფრთხოებამდე“.

„თურქეთი სტაბილურობის კუნძულად გვევლინება“

„ამ პერიოდში, როდესაც ჩვენი რეგიონი ომებისა და კრიზისების სერიას ებრძვის, თურქეთი თავისი ეკონომიკით, ინფრასტრუქტურით, გამოცდილი ინსტიტუტებით, კვალიფიციური კადრებით და რაც ყველაზე მთავარია, განმტკიცებული შიდა ფრონტით, სტაბილურობის კუნძულად გვევლინება“, - განაგრძო პრეზიდენტმა. „კრიტიკისა და დაბრკოლებების მიუხედავად, ჩვენ ვიმკით იმ პოლიტიკის ნაყოფს, რომელსაც 23 წელია ვატარებთ ყველა სფეროში, განსაკუთრებით კი თავდაცვის ინდუსტრიაში. 1,6 ტრილიონ დოლარზე მეტი ეკონომიკური მოცულობით (რომელიც 238 მილიარდი დოლარიდან გაიზარდა), 276 მილიარდ დოლარამდე გაზრდილი ყოველწლიური ექსპორტით (36 მილიარდიდან) და თავდაცვისა და საავიაციო სექტორის ექსპორტით, რომელმაც 10 მილიარდ დოლარს გადააჭარბა (248 მილიონიდან), თურქეთი მსოფლიოში იშვიათ წარმატების ისტორიას წერს“.

პრეზიდენტი ასევე შეეხო თურქეთის ნებას ტერორიზმთან ბრძოლაში და ამ საკითხის მნიშვნელობას შემდეგი სიტყვებით გაუსვა ხაზი: „იმედია, მას შემდეგ, რაც ჩვენს ირგვლივ მტვრის ღრუბელი გაიფანტება, თურქეთი ახალი ეპოქის ერთ-ერთი ამომავალი ვარსკვლავი გახდება. ამისთვის ყველაფერს ვაკეთებთ, რაც საჭიროა. ერთ-ერთი ასეთი ნაბიჯია პროცესი სახელწოდებით 'თურქეთი ტერორიზმის გარეშე', რომლის სტრატეგიული მნიშვნელობა ჩვენი ქვეყნის მომავლისა და რეგიონის სტაბილურობისთვის დღეს კიდევ უფრო უკეთ ჩანს. ჩვენ დიდი გულმოდგინებით, კეთილგონიერებითა და გულწრფელობით მიგვყავს ეს ისტორიული პროცესი ფინალამდე, რაც ხელს უწყობს მშვიდობისა და უსაფრთხოების განმტკიცებას ჩვენს საზღვრებში და იმპერიალისტური გეგმების ჩაშლას მათ მიღმა. ჩვენი ნება ურყევია, რათა ერი ვიხსნათ ამ უბედურებისგან, რომლის მხოლოდ ეკონომიკურმა ზარალმა თურქეთისთვის 2 ტრილიონ დოლარს გადააჭარბა. მყარად და სწრაფად ვაგრძელებთ გზას“.