კვირას გავრცელებული ინფორმაციით, ირანმა შესთავაზა ჰორმუზის სრუტის ხელახლა გახსნა და ომის დასრულება, ხოლო ბირთვული მოლაპარაკებების შემდგომი ეტაპისთვის გადადება.
საინფორმაციო პორტალ Axios-ის მიერ გამოქვეყნებული ამ ცნობის თანახმად, ირანის ბირთვულ პროგრამასთან დაკავშირებული დიპლომატიური ჩიხის შემდეგ, ეს წინადადება აშშ-ს შუამავლების, მათ შორის პაკისტანის მეშვეობით გადაეცა.
საკითხთან დაახლოებული წყაროები აღნიშნავენ, რომ გეგმა ითვალისწინებს ურანის გამდიდრებასთან დაკავშირებული უთანხმოებების დროებით გვერდზე გადადებას და ფოკუსირებას უფრო სწრაფ შეთანხმებაზე, რომელიც ბლოკადის მოხსნასა და საზღვაო მიმოსვლის აღდგენას გულისხმობს.
შეთავაზების მიხედვით, ცეცხლის შეწყვეტის რეჟიმი ხანგრძლივი ვადით გაგრძელდება ან მუდმივი გახდება, ხოლო ბირთვული მოლაპარაკებები მხოლოდ მას შემდეგ დაიწყება, რაც სრუტე გაიხსნება და შეზღუდვები მოიხსნება.
ამერიკელმა მაღალჩინოსანმა და მოლაპარაკებების შესახებ ინფორმირებულმა პირებმა განაცხადეს, რომ თეთრმა სახლმა მიიღო ეს წინადადება, თუმცა ჯერჯერობით არ მიუნიშნებიათ, აპირებენ თუ არა მის განხილვას.
მოსალოდნელია, რომ აშშ-ის პრეზიდენტი დონალდ ტრამპი ორშაბათს ეროვნული უსაფრთხოების მაღალჩინოსნებთან ერთად გამართავს თათბირს „საგანგებო სიტუაციების ოთახში“, რათა განიხილოს არსებული ჩიხური მდგომარეობა და შესაძლო ნაბიჯები.
ტრამპმა აღნიშნა, რომ თეირანზე ზეწოლის გასაზრდელად ის ირანის პორტების საზღვაო ბლოკადის გაგრძელებას უჭერს მხარს.
„თუ გაქვს დიდი რაოდენობით ნავთობი და ეს ხაზი ჩაიკეტება, ის შიგნიდან ფეთქდება,“ - განაცხადა ტრამპმა და დასძინა, რომ ირანს შიდა ზეწოლის დაწყებამდე მხოლოდ „დაახლოებით სამი დღე“ აქვს დარჩენილი.
გასულ უქმეებზე დიპლომატიური ძალისხმევა გააქტიურდა; ირანის საგარეო საქმეთა მინისტრმა აბას არაღჩიმ ჰორმუზის სრუტის საკითხზე მოლაპარაკებები გამართა პაკისტანის დედაქალაქ ისლამაბადსა და ომანის დედაქალაქ მასკატში.
არაღჩი ორშაბათს დილით სანქტ-პეტერბურგში ჩავიდა, რათა მაღალი დონის შეხვედრები გამართოს რუსეთის პრეზიდენტ ვლადიმერ პუტინთან და სხვა მაღალჩინოსნებთან.
თეთრი სახლის პრესსპიკერმა ოლივია უელსმა განაცხადა: „ეს არის სენსიტიური დიპლომატიური მოლაპარაკებები. კარტები აშშ-ის ხელშია“.
ირანმა და აშშ-მ 11-12 აპრილს ისლამაბადში გამართეს შეხვედრები, თუმცა კონფლიქტის დასასრულებლად შეთანხმებას ვერ მიაღწიეს.
მოლაპარაკებები მას შემდეგ დაიწყო, რაც პაკისტანმა 8 აპრილს ორკვირიან ცეცხლის შეწყვეტის შეთანხმებას მიაღწია, რომელიც მოგვიანებით ტრამპმა გაახანგრძლივა.
მიუხედავად იმისა, რომ მოლაპარაკებების ახალი რაუნდისთვის ძალისხმევა გრძელდება, მთავარ სადავო საკითხებად კვლავ რჩება ჰორმუზის სრუტე, აშშ-ის ბლოკადა ირანის პორტებზე და ირანის უფლება ურანის გამდიდრებაზე.
