უკრაინის პრეზიდენტმა ვოლოდიმირ ზელენსკიმ განაცხადა, რომ კიევი უპილოტო საფრენი აპარატებისა და რაკეტების წარმოებას ზრდის და რუსეთის თავდასხმებს „სიმეტრიულად“ უპასუხებს.
„დღის წესრიგში ჩვენი ქმედებების დაგეგმვა, რუსეთის თავდასხმებზე რეაგირებისთვის მზადება და პრევენციული ზომების მიღება იდგა,“ – განაცხადა ზელენსკიმ სამშაბათს მაღალი რანგის სამხედრო პირებთან გამართული გაფართოებული შეხვედრის შემდეგ და ხაზი გაუსვა, რომ უკრაინა ადგილობრივ უპილოტო და შორ მანძილზე მოქმედ შესაძლებლობებს გააფართოებს.
ზელენსკიმ თქვა, რომ ევროპის ქვეყნებთან ახალი შეთანხმებები მზადდება და ეს შეთანხმებები მიზნად ისახავს უკრაინაში, განსაკუთრებით უპილოტო სისტემებისა და შორ მანძილზე მოქმედი იარაღის წარმოებაში ინვესტიციების მოზიდვას.
„ჩვენი პერსპექტივაა, რუსეთიდან მომდინარე ყველა საფრთხეს სიმეტრიულად ვუპასუხოთ,“ – თქვა ზელენსკიმ, – „რუსეთში მყოფებმა უნდა იგრძნონ უკრაინის წინააღმდეგ ჩადენილი ქმედებების შედეგები. და იგრძნობენ კიდეც.“
რუსეთმა უკრაინული დრონები მოიგერია
რუსეთის თავდაცვის სამინისტრომ ოთხშაბათს დილით გაკეთებულ განცხადებაში აღნიშნა, რომ სამი საათის განმავლობაში, უმეტესად ცენტრალურ და სამხრეთ რეგიონებში, 112 უკრაინული დრონი გაანადგურეს ან გააუვნებელყვეს.
მოსკოვის მერმა სერგეი სობიანინმა თქვა, რომ ექვსი უკრაინული დრონი, რომლებიც რუსეთის დედაქალაქისკენ მიემართებოდნენ, მოიგერიეს. აღინიშნა, რომ სამაშველო ჯგუფები ადგილზე ნამსხვრევებს სწავლობენ.
რუსეთმა ასევე განაცხადა, რომ ბოლო დღეებში უკრაინის წინააღმდეგ განხორციელებული ინტენსიური საჰაერო თავდასხმები იყო „პასუხი“ საკუთარ სამოქალაქო მოსახლეობაზე უკრაინული დრონებით გახშირებულ თავდასხმებზე და კიევი სამშვიდობო ძალისხმევის „ხელის შეშლის“ მცდელობაში დაადანაშაულა.
მოსკოვმა, რომელმაც უარყო კიევისა და დასავლელი მოკავშირეების 30-დღიანი უპირობო ცეცხლის შეწყვეტის შეთავაზებები, პარასკევი ღამიდან ორშაბათ დილამდე ასობით დრონით უკრაინას თავს დაესხა.
