თურქეთი მიესალმა ღაზაში ცეცხლის შეწყვეტას, რომელსაც დიდი ხანია ელიან, და მოუწოდა საერთაშორისო საზოგადოებას, დაიცვას მყიფე ზავი ომით განადგურებულ რეგიონში და მხარი დაუჭიროს ჰუმანიტარულ დახმარებასა და აღდგენით სამუშაოებს.

ხუთშაბათს გაეროს უშიშროების საბჭოს პალესტინის სესიაზე სიტყვით გამოსვლისას, თურქეთის გაეროში მუდმივი წარმომადგენლის მოადგილემ ასლი გიუვენმა განაცხადა: „თურქეთი მიესალმება ღაზაში ცეცხლის შეწყვეტის მიღწევას და მოითხოვს ცეცხლის შეწყვეტის შეთანხმების სრულ და დაუყოვნებლივ შესრულებას“.

„როგორც საერთაშორისო საზოგადოების, ჩვენი უმნიშვნელოვანესი პრიორიტეტი უნდა იყოს ამ დიდი ხნის ნანატრი და ძნელად მოპოვებული ცეცხლის შეწყვეტის ნებისმიერ ფასად შენარჩუნება“, - დასძინა გიუვენმა.

მან ისაუბრა ოკუპირებულ დასავლეთ სანაპიროზე ცეცხლის შეწყვეტის დარღვევისა და პალესტინის ტერიტორიების მიმტაცებელი ისრაელელბის ძალადობის აღკვეთის აუცილებლობაზე და გააკეთა გაფრთხილება: „ისრაელის თავდასხმები და დესტაბილიზაციის პოლიტიკა ლიბანის, სირიისა და მთელი რეგიონის წინააღმდეგ უნდა შეწყდეს“.

„ახლო აღმოსავლეთს აღარ შეუძლია ომის მუდმივი ციკლის ატანა. კონფლიქტები უნდა გადაწყდეს დიპლომატიური ჩართულობითა და მოლაპარაკებებით და არა ძალის გამოყენებით“, - განაცხადა თურქმა დიპლომატმა.

გიუვენმა აღნიშნა, რომ მეორე პრიორიტეტია ღაზაში ჰუმანიტარული დახმარების შეუფერხებლად მიწოდება და „აღდგენითი სამუშაოების დაუყოვნებლივ დაწყება, გაეროს შესაბამის ორგანიზაციებთან, მათ შორის UNWRA-სთან მჭიდრო კოორდინაციაში“.