ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ისრაელმა და აშშ-მა დაიწყეს ერთობლივი ოპერაცია იმ „ეგზისტენციალური საფრთხის“ აღმოსაფხვრელად, რომელსაც, მისი თქმით, ირანის მთავრობა ქმნის.
შაბათს გამოქვეყნებულ ვიდეომიმართვაში ნეთანიაჰუმ აღნიშნა, რომ თეირანის „მკვლელი ტერორისტული რეჟიმი“ არ უნდა იყოს აღჭურვილი ბირთვული იარაღით, რომელმაც შესაძლოა საფრთხე შეუქმნას „მთელ კაცობრიობას“.
ნეთანიაჰუმ თქვა: „ჩვენი ერთობლივი ოპერაცია შექმნის აუცილებელ პირობებს იმისთვის, რომ მამაცმა ირანელმა ხალხმა საკუთარი ბედი თავად განკარგოს“.
ნეთანიაჰუმ მოუწოდა ირანელი ხალხის ყველა ფენას, მათ შორის სპარსელებს, ქურთებს, აზერბაიჯანელებს, ბელუჯებსა და აჰვაზელებს, „გაითავისუფლონ თავი ტირანიის უღლისგან“ და ჩამოაყალიბონ „თავისუფალი და მშვიდობისმოყვარე ირანი“.
ნეთანიაჰუმ აღნიშნა, რომ ირანის წინააღმდეგ დაწყებული ოპერაცია ბევრად უფრო ძლიერია, ვიდრე წინა ნაბიჯები და კიდევ ერთხელ დაადასტურა, რომ ისრაელი არ დაუშვებს თეირანის მიერ ბირთვული იარაღის მოპოვებას.
შაბათს, დილით ადრე, ისრაელმა დაიწყო ოპერაცია სახელწოდებით „ლომის ღრიალი“ და ქვეყნის მასშტაბით გამოაცხადა „სპეციალური და დაუყოვნებლივ“ ამოქმედებული საგანგებო მდგომარეობა.
მოგვიანებით აშშ-ის პრეზიდენტმა დონალდ ტრამპმა განაცხადა, რომ აშშ-მაც დაიწყო „ფართომასშტაბიანი საბრძოლო ოპერაციები“ „ირანის რეჟიმის“ წინააღმდეგ.
თავდასხმები განხორციელდა მაშინ, როდესაც ვაშინგტონსა და თეირანს შორის ომანის შუამავლობით მიმდინარეობდა მოლაპარაკებები ირანის ბირთვული პროგრამის შესახებ. ჟენევაში გამართული მოლაპარაკებების ბოლო რაუნდი ხუთშაბათს დასრულდა.
გასულ ივნისში, ისრაელ-ირანის 12-დღიანი ომის დროს, აშშ-მა ირანში სამ ბირთვულ ობიექტზე მიიტანა იერიში.
