ორმა მაღალი რანგის ამერიკელმა მაღალჩინოსანმა განაცხადა, რომ აშშ-ი ღაზის სტაბილიზაციისთვის შექმნილი ერთობლივი სამუშაო ჯგუფის ფარგლებში 200 სამხედრო მოსამსახურეს განალაგებს, თუმცა ღაზის სექტორში ადგილზე არცერთი ამერიკელი ჯარისკაცი არ იქნება.
ხუთშაბათს ჟურნალისტებთან ანონიმურად საუბრისას, მაღალჩინოსნებმა განაცხადეს, რომ ეს 200 ადამიანი სამუშაო ჯგუფის ბირთვს შეადგენს და გუნდი ასევე მოიცავს ეგვიპტის, კატარის, თურქეთის და შესაძლოა, არაბთა გაერთიანებული საამიროების წარმომადგენლებსაც.
მათ ასევე განაცხადეს, რომ ჯერჯერობით დადგენილი არ არის აშშ-ის სამხედროების სრული განლაგების ადგილი, თუმცა შეიქმნება ერთობლივი კონტროლის ცენტრი და შესაძლო კონფლიქტების თავიდან ასაცილებლად, ღაზაში მომუშავე სხვა უსაფრთხოების ძალები ისრაელის ძალებთან კოორდინირებულად იმუშავებენ. მათ ასევე თქვეს, რომ "არ იგეგმება არცერთი ამერიკელი ჯარისკაცის შესვლა ღაზაში".
ამერიკელმა მაღალჩინოსნებმა ხაზგასმით აღნიშნეს, რომ შეთანხმების ძალაში შესვლით რეგიონში დაძაბულობის შემცირებისა და ისრაელსა და არაბულ ქვეყნებს შორის ახალი ნორმალიზაციის შეთანხმებების გზის გახსნის იმედი აქვთ.
შეგახსენებთ, რომ აშშ-ის პრეზიდენტი დონალდ ტრამპი თავის პირველი ვადის დროს ისრაელსა და ბაჰრეინს, არაბთა გაერთიანებულ საამიროებს, მაროკოსა და სუდანს შორის ხელმოწერილი "აბრაამის შეთანხმებების" ავტორი იყო.
