თურქეთის ეროვნული თავდაცვის სამინისტროს პრესისა და საზოგადოებასთან ურთიერთობის მრჩეველმა და სამინისტროს პრესსპიკერმა, კონტრადმირალმა ზექი აქთიურქმა, ყოველკვირეულ საინფორმაციო ბრიფინგზე ისაუბრა. ბრიფინგი გაიმართა ხომალდ „TCG Anadolu“-ზე, რომელიც სწავლება „ზღვის მგელი II“-ის (Denizkurdu-II) ფარგლებში ანტალიის სანაპიროსთან იმყოფება.
კონტრადმირალმა აქთიურქმა აღნიშნა, რომ სწავლება შავ, მარმარილოს, ეგეოსისა და აღმოსავლეთ ხმელთაშუა ზღვებში მიმდინარეობს. მისი მიზანია სამხედრო-საზღვაო ძალების ოპერატიული მართვის ეფექტურობის შეფასება, მრავალმხრივი საფრთხეების პირობებში პირადი შემადგენლობის განსჯის, პროგნოზირებისა და გადაწყვეტილების მიღების უნარების განვითარება, ასევე სხვადასხვა სარდლობებს შორის ერთობლივი მოქმედების მეთოდების გამოცდა.
თავის განცხადებაში აქთიურქი ჩრდილოეთ კვიპროსის თურქული რესპუბლიკის (ჩკთრ) საკითხსაც შეეხო: „ზოგიერთ მედიასაშუალებასა და სოციალურ ქსელში გავრცელებული ორგანიზებული და შეგნებულად პროვოკაციული ბრალდებები იმის შესახებ, თითქოს თურქულმა თვითმფრინავებმა შეავიწროვეს საბერძნეთის თავდაცვის მინისტრისა და ევროპელი მინისტრების გადამყვანი საჰაერო ხომალდები, სიმართლეს არ შეესაბამება. ჩანს, რომ საბერძნეთი და კვიპროსის ბერძნული ადმინისტრაცია უგულებელყოფენ ჩრდილოეთ კვიპროსის თურქული რესპუბლიკის უფლებებსა და ინტერესებს, არ ითვალისწინებენ რეგიონში არსებულ ფაქიზ ბალანსს და პერიოდულად ახორციელებენ ქმედებებს, რომლებიც ჩკთრ-ის საჰაერო სივრცის დარღვევას წარმოადგენს“.
„7 ივნისს, საბერძნეთი-კვიპროსის ბერძნული ადმინისტრაციის მარშრუტით მოძრავი 6 საჰაერო ხომალდიდან 4-მა დაარღვია ჩკთრ-ის საჰაერო სივრცე. ამის გამო, ჩრდილოეთ კვიპროსში ბაზირებული ჩვენი ორი F-16 ტიპის მოიერიშე თვითმფრინავი, რომლებიც საგანგებო მორიგეობაზე იმყოფებოდნენ, პრევენციის მიზნით დაუყოვნებლივ ჰაერში აიჭრა. ჩვენმა თვითმფრინავებმა დავალება ჩკთრ-ის საჰაერო სივრცეში შეასრულეს, მათ არ დაურღვევიათ კვიპროსის ბერძნული მხარის საჰაერო სივრცე და არც ზემოხსენებული ხომალდების შევიწროება მომხდარა. რეგიონში დაძაბულობის გამამწვავებელი და პროვოკაციული მცდელობები, რომლებიც მიზნად ისახავს „მსხვერპლის“ იმიჯის შექმნას, მიუღებელია“.
