აშშ-ის პრეზიდენტმა დონალდ ტრამპმა შაბათს გაკეთებულ განცხადებაში აღნიშნა, რომ აშშ-მა ირანში „ფართომასშტაბიანი საბრძოლო ოპერაციები“ დაიწყო და გააფრთხილა, რომ ამერიკულ მხარეს შესაძლოა დანაკარგები ჰქონდეს.
ტრამპმა აღნიშნა, რომ თავდასხმების მიზანი ირანის სარაკეტო პოტენციალის განადგურება და მისი საზღვაო ფლოტის მოსპობაა. თავდასხმები მოჰყვა აშშ-ისა და ისრაელის გაფრთხილებებს იმის შესახებ, რომ ირანი კვლავ გახდებოდა სამიზნე, თუ ის ბირთვულ და ბალისტიკურ სარაკეტო პროგრამებს გააგრძელებდა.
ტრამპმა Truth Social-ზე გამოქვეყნებულ ვიდეოში თქვა: „ამ განცხადებას მსუბუქად არ ვაკეთებ. ირანის რეჟიმს მკვლელობა სურს“.
ტრამპმა აღნიშნა: „შესაძლოა მამაცი ამერიკელი გმირების სიცოცხლე შეეწიროს და, როგორც ეს ომებში ხშირად ხდება, დანაკარგები გვქონდეს. თუმცა ამას მხოლოდ დღევანდელი დღისთვის არ ვაკეთებთ. ჩვენ ამას მომავლისთვის ვაკეთებთ და ეს კეთილშობილური მისიაა“.
ტრამპმა ირანის შეიარაღებულ ძალებსა და „ისლამური რევოლუციის გუშაგთა კორპუსის“ წევრებს იარაღის დაყრისკენ მოუწოდა და განაცხადა, რომ ჩაბარების შემთხვევაში მათ ხელშეუხებლობა გარანტირებული ექნებათ.
ტრამპის თქმით, სხვა ალტერნატივა არის „გარდაუვალი სიკვდილი“.
ბოლო კვირების განმავლობაში ვაშინგტონსა და თეირანს შორის ირანის ბირთვულ მიზნებთან დაკავშირებით არაერთი შეხვედრა გაიმართა.
მხარეებს შორის ბოლო შეხვედრა ხუთშაბათს შედგა, თუმცა შეთანხმება ვერ იქნა მიღწეული.
ტრამპმა თქვა: „ირანმა, როგორც ამას ათწლეულების განმავლობაში აკეთებდა, ესეც უარყო. მან ბირთვულ მიზნებზე უარის თქმის ყველა შესაძლებლობაზე უარი თქვა და ჩვენ ამას მეტს ვეღარ მოვითმენთ“.
