ხელოვნური ინტელექტის კომპანია Anthropic-მა განაცხადა, რომ არ შეასრულებს აშშ-ის თავდაცვის სამინისტროს მოთხოვნას ხელოვნური ინტელექტის სისტემებში დამცავი მექანიზმების შერბილების შესახებ, მასობრივი თვალთვალისა და ავტონომიური იარაღის მიმართ არსებული შეშფოთების გამო.
ხუთშაბათს გაკეთებულ განცხადებაში, აღმასრულებელმა დირექტორმა დარიო ამოდეიმ აღნიშნა, რომ კომპანია ეწინააღმდეგება მისი AI მოდელის, Claude-ის გამოყენებას „მასობრივი შიდა თვალთვალისთვის“ ან „სრულად ავტონომიური იარაღისთვის“.
ამოდეიმ განმარტა, რომ ხელოვნური ინტელექტის მოწინავე სისტემები არ არის საკმარისად საიმედო იმისთვის, რომ მსგავსი იარაღი ადამიანის ზედამხედველობის გარეშე მართონ და საჭიროებენ უსაფრთხოების ისეთ ზომებს, რომლებიც დღევანდელ პირობებში არ არსებობს.
მან ასევე გააფრთხილა, რომ მიუხედავად იმისა, რომ ხელოვნურ ინტელექტს შეუძლია ეროვნული უსაფრთხოების მხარდაჭერა, ხელოვნური ინტელექტის მიერ მართულმა ფართომასშტაბიანმა თვალთვალმა შესაძლოა საფრთხე შეუქმნას სამოქალაქო თავისუფლებებს.
Anthropic და პენტაგონი კვირების განმავლობაში აწარმოებენ მოლაპარაკებებს
ტრამპის ადმინისტრაცია დაემუქრა Anthropic-ს „თავდაცვის წარმოების აქტის“ (Defense Production Act) გამოყენებით, რომელიც მთავრობას აძლევს უფლებამოსილებას, აიძულოს კომპანიები პრიორიტეტი ეროვნული თავდაცვის საჭიროებებს მიანიჭონ. ასევე განიხილება მისი „მიწოდების ჯაჭვის რისკად“ კლასიფიცირება. მსგავსი სტატუსი თავდაცვის სამინისტროს კონტრაქტორებს კომპანიის პროგრამული უზრუნველყოფის გამოყენებას აუკრძალავს.
Axios-ის ინფორმაციით, პენტაგონმა დაიწყო ნაბიჯების გადადგმა ამ კლასიფიკაციისკენ და Boeing-სა და Lockheed Martin-ს სთხოვა, დეტალურად აღწერონ თავიანთი დამოკიდებულება Claude-ზე.
პენტაგონის პრესსპიკერმა შონ პარნელმა უარყო, რომ უწყება ხელოვნური ინტელექტის უკანონო თვალთვალისთვის ან ადამიანის ჩარევის გარეშე სრულად ავტონომიური იარაღისთვის გამოყენებას აპირებს.
X-ზე გამოქვეყნებულ პოსტში პარნელმა აღნიშნა, რომ პენტაგონი აპირებს Anthropic-ის მოდელის გამოყენებას „ყველა კანონიერი მიზნისთვის“ და ისინი არ მისცემენ კერძო კომპანიას ოპერაციული გადაწყვეტილებების განსაზღვრის უფლებას.
