თურქეთის თავდაცვის სფეროს წარმომადგენლების თანახმად, HÜRJET-ის ორმა პროტოტიპმა დაახლოებით 340 და 260 საფრენი საათი შეასრულა, ხოლო თურქეთი პროგრესს აღწევს პირველი მოწინავე სასწავლო რეაქტიული თვითმფრინავის ტესტირების, სერიული წარმოებისა და ექსპორტის მიმართულებით.

თურქეთის საავიაციო და კოსმოსური მრეწველობის კომპანიის (TUSAŞ) მიერ შემუშავებული HÜRJET-ის გადაცემა თურქეთის საჰაერო ძალების საჩვენებელი ჯგუფისთვის, „თურქეთის ვარსკვლავებისთვის“, 2026 წელს იგეგმება. სანამ გადასაცემი თვითმფრინავის აწყობის სამუშაოები მიმდინარეობს, მოსალოდნელია, რომ ახლად წარმოებული თვითმფრინავი პირველ გაფრენას მომავალი წლის პირველ კვარტალში განახორციელებს.

პროექტი 2017 წლის აგვისტოში დაიწყო, თვითმფრინავმა კი პირველი გაფრენა 2023 წლის აპრილში შეასრულა.

მანამდე, 2022 წლის ივნისში, პირველი დასრულებული კომპონენტი საბოლოო აწყობის ხაზზე შევიდა; ამას მოჰყვა სახმელეთო ტესტები, რაც მოიცავდა სადესანტო შასის გამოცდას, სადენების შემოწმებას, კაბინის მექანიზმებს, სრულ ავიონიკას, ელექტრო და საწვავის სისტემების ტესტირებას.

თურქეთის პირველი რეაქტიული ზებგერითი სასწავლო თვითმფრინავის ძრავა პირველად 2023 წლის 30 იანვარს ამუშავდა. 2023 წლის 25 აპრილს თვითმფრინავმა პირველი გაფრენა შეასრულა. მას შემდეგ ტესტირება საპროექტო შესაძლებლობების ფარგლებში გრძელდება.

ტესტირების დროს ორმა HÜRJET-მა სხვადასხვა კამუფლაჟით ჯგუფური ფრენა შეასრულა, ხოლო კიდევ ერთმა თვითმფრინავმა „თურქეთის ვარსკვლავების“ საჩვენებელ ჯგუფთან ერთად იფრინა; ამ გამოსვლებმა დიდი ინტერესი გამოიწვია.

TUSAŞ აყალიბებს საწარმოო ხაზს, რომელსაც თვეში ორი თვითმფრინავის გამოშვება შეეძლება. მოსალოდნელია, რომ თურქეთის საჰაერო ძალები თავდაპირველად 16 ერთეულ თვითმფრინავს შეიძენს; ახალი კონფიგურაციების დამატებასთან ერთად, საერთო რაოდენობა გაიზრდება.

ერთძრავიანი რეაქტიული თვითმფრინავი განკუთვნილია თანამედროვე საბრძოლო თვითმფრინავების პილოტთა მომზადებისთვის, შეიარაღებული და შეუიარაღებელი საჰაერო პატრულირებისა და საჩვენებელი მისიებისთვის. 13,6 მეტრი სიგრძის, 4,1 მეტრი სიმაღლისა და 9,5 მეტრი ფრთების შლილის მქონე HÜRJET-ს 1,4 მახის სიჩქარის განვითარება და მაქსიმუმ 45 ათასი ფუტის სიმაღლეზე ფრენა შეუძლია. HÜRJET გვთავაზობს შვიდ სადგურს (საკიდს) სხვადასხვა საბრძოლო ტვირთისთვის და ჯამში სამი ტონა ტვირთის გადატანის შესაძლებლობას.

TUSAŞ-ი HÜRJET-ისთვის ესპანეთთან საექსპორტო შეთანხმების გასაფორმებლად ემზადება; TUSAŞ-ის გენერალურმა დირექტორმა მეჰმეთ დემიროღლუმ ესპანურ გამოცემა El Español-თან ინტერვიუში განაცხადა, რომ საბოლოო ხელშეკრულება შესყიდვის შესახებ შესაძლოა მალე გაფორმდეს.

დემიროღლუმ აღნიშნა, რომ HÜRJET არის რეაქტიული სასწავლო თვითმფრინავი, რომელიც ძირითადად სასწავლო მიზნებისთვისაა შექმნილი. თუმცა, მან ასევე განაცხადა, რომ ახალი მისიების საჭიროებების ან ვარიაციების მოთხოვნის შემთხვევაში, TUSAŞ-ს აქვს უნარი, სწრაფად მოერგოს ამ მოთხოვნებს. რაც შეეხება მოდიფიკაციებსა და მიწოდების გრაფიკს, ისინი ხელშეკრულების ხელმოწერისთანავე გახდება ცნობილი.

შეთანხმება ითვალისწინებს დაახლოებით 45 HÜRJET-ის შეძენას, რომელთა სავარაუდო ღირებულება 3,12 მილიარდი ევრო (3,6 მილიარდი დოლარია). ეს თვითმფრინავები ესპანეთის მოძველებულ F-5-ების ფლოტს ჩაანაცვლებს. მიწოდების დაწყება 2028 წლისთვის არის დაგეგმილი.