საფრანგეთში სკოლის მოსწავლეების მიერ განათლების პირობების გაუმჯობესების მოთხოვნით გამართული აქციები ფართოვდება, რომელსაც ადგილ-ადგილ ძალადობრივი ხასიათი აქვს.
დედაქალაქ პარიზში, კლოდ მონეს ლიცეუმის წინ შეკრებილმა ასობით მოსწავლემ ნაგვის ურნებით ჩაკეტა სკოლის შესასვლელი. პლაკატებითა და სლოგანებით შეკრებილმა სტუდენტებმა განათლების პირობების გაუმჯობესება მოითხოვეს.
ქალაქ ლიონში ათობით სკოლაში გრძელდება აქციები, ხოლო სენ-ჟუსტის ლიცეუმი, რომელიც სტუდენტებმა გუშინ დაწვეს, დღეს დაიკეტა.
მოსწავლეებმა ქალაქ ნანტში, ნელსონ მანდელას ლიცეუმსაც გაუჩინეს ცეცხლი დილით, რის გამოც სკოლის მიმდებარე გზები დროებით გადაიკეტა.
ბუშ-დიუ-რონის პრეფექტურამ რეგიონის მასშტაბით აქციებით დაზარალებული 40 სკოლა დაასახელა. პრეფექტურის ცნობით, ამ სკოლებიდან 18-ის შესასვლელი მოსწავლეების მიერ არის ბლოკირებული.
გარდა ამისა, სოციალურ ქსელებში გავრცელდა კადრები, სადაც ჩანს, რომ მარსელში გამართული აქციების დროს მოსწავლეებმა ავტობუსი დაწვეს.
მარსელში, სენტ-ეგზიუპერის ლიცეუმში გამართული საპროტესტო აქციების დროს ცეცხლი წაუკიდეს მეხანძრეთა მანქანას. ინციდენტების შედეგად ერთი მეხანძრე მსუბუქად დაშავდა.
აქციის მონაწილეებმა სკოლების მიმდებარედ ზოგიერთი საზოგადოებრივი ტრანსპორტის ავტობუსიც მიიტაცეს. ქალაქის საზოგადოებრივი ტრანსპორტის ოპერატორმა, კომპანია RTM-მა წერილობით განცხადებაში დაგმო დემონსტრანტების „უპასუხისმგებლო ქმედებები“. განცხადებაში მოწოდებულია, რომ არ დააზიანონ საზოგადოებრივი მომსახურებისთვის მომუშავე ავტობუსის მძღოლები და მათი მანქანები.
მარსელში აქტივისტების მიერ დაწესებულ ობიექტებს შორის იყო ტრამვაის ხაზიც, რამაც რკინიგზის მიმოსვლის შეფერხება გამოიწვია.
ალპ-მარიტიმის რეგიონშიც აქციები ფართოვდება, სადაც გუშინ ღამიდან დღემდე 50 ადამიანი დააკავეს.
სკოლებში დაწყებული პროტესტი უნივერსიტეტებზეც გავრცელდა
დილის საათებიდან დედაქალაქ პარიზის ჩათვლით, ქვეყნის მრავალ უნივერსიტეტში სტუდენტების მიერ ბლოკირების აქციები დაიწყო.
26 უნივერსიტეტის სტუდენტებმა, ძირითადად პარიზში, სტრასბურგში, მონპელიეში, ტურში, ლილში, ლიონსა და დიჟონში, სკოლის მოსწავლეებთან სოლიდარობის ნიშნად უნივერსიტეტების შესასვლელები ჩაკეტეს.
პარიზის გარეუბან სენ-დენისში, „პარიზ 8“-ის უნივერსიტეტის წინ სტუდენტთა ჯგუფმა ნაგვის ურნებით ბარიერები შექმნა. უნივერსიტეტის სტუდენტები მთავრობისგან მოითხოვენ სტუდენტებისთვის გამოყოფილი ბიუჯეტის წილის გაზრდას.
საფრანგეთის მრავალ ქალაქში გავრცელებულ და გაძლიერებულ პროტესტში სამართალდამცავები ჩაერივნენ. ხალხის დაშლის მიზნით პოლიციასა და აქტივისტებს შორის შეტაკებები მოხდა. პოლიციამ აქტივისტების დასაშლელად ცრემლსადენი გაზი გამოიყენა.
მთავრობამ გუშინ განაცხადა, რომ საფრანგეთში გამართულ აქციებზე, სადაც სტუდენტები განათლების პირობების გაუმჯობესებას ითხოვდნენ, დაშავდა 202 ადამიანი, მათ შორის მოსწავლეები, პედაგოგიური პერსონალი და უსაფრთხოების ძალები.
აქციების ფარგლებში სულ დაკავებულია 625 ადამიანი.
