ბელგიაში ოთხშაბათს გამართული ეროვნული გაფიცვის მესამე და ბოლო დღემ ბრიუსელის აეროპორტში ფრენების უმეტესობის გაუქმება და საზოგადოებრივი ტრანსპორტის შეფერხება გამოიწვია.

გაფიცვა, რომელიც ქვეყნის მთავარი პროფკავშირების მიერ იყო ორგანიზებული, პრემიერ-მინისტრ ბარტ დე ვევერის კოალიციური მთავრობის წინააღმდეგ მიმართული საპროტესტო აქციების სერიაში უახლეს მოვლენად შეფასდა.

აქციის მონაწილეები მთავრობის მიერ შეთავაზებულ საპენსიო და შრომის ბაზრის რეფორმებს ეწინააღმდეგებიან.

ბრიუსელის აეროპორტმა ყველა აფრენის გაუქმების შესახებ განაცხადა, ხოლო დაგეგმილი 203 დაშვებიდან 110 ასევე გაუქმდა.

ქვეყნის მეორე მთავარმა აეროპორტმა, შარლერუამ კი ვებგვერდზე გამოაქვეყნა ინფორმაცია, რომ პერსონალის ნაკლებობის გამო მოსალოდნელია სერიოზული შეფერხებები და დაგეგმილი აფრენა-დაშვებები გარანტირებული ვერ იქნება.

ადგილობრივი მედიის ცნობით, მოსალოდნელია, რომ გაფიცვის ბოლო დღე სკოლებზე, საზოგადოებრივ ტრანსპორტსა და კერძო სექტორზეც იქონიებს გავლენას, რაც უფრო მასშტაბურ შეფერხებებს გამოიწვევს.

ოთხშაბათს, შუადღის შემდეგ, ბრიუსელში საპროტესტო აქცია იგეგმება. ოქტომბერში გამართულ მსგავს დემონსტრაციაში დაახლოებით 80 000 ადამიანი მონაწილეობდა.

სოციალისტურმა პროფკავშირმა ABVV-FGTB-მ თავის ვებგვერდზე გამოქვეყნებულ განცხადებაში აღნიშნა: „დე ვევერის მთავრობის საბიუჯეტო გზავნილი მკაცრია: იმუშავეთ უფრო დიდხანს და მძიმედ ნაკლები პენსიის, ჯანდაცვისა და მსყიდველობითი უნარის გარანტიებისთვის“.

ბიუჯეტის დეფიციტი

ლიბერალური პროფკავშირის, ACLVB-ის ხელმძღვანელმა გერტ ტრუიენსმა ბელგიის საზოგადოებრივ მაუწყებელთან (VRT) საუბრისას მწუხარება გამოთქვა იმის გამო, რომ ეროვნულმა მთავრობამ პროფკავშირებთან კონსულტაციები არ გაიარა. მან განაცხადა: „შეთანხმებები ქუჩებში, გაფიცვების დროს არ იდება; ეს ხდება მოლაპარაკების მაგიდასთან, თუმცა ამისთვის შესაძლებლობა უნდა მოგეცეთ“.

თვეების განმავლობაში მიმდინარე დაძაბული მოლაპარაკებების შემდეგ, მთავრობამ ორშაბათს მომავალი წლის ბიუჯეტზე შეთანხმებას მიაღწია, თუმცა აღნიშნული გაფიცვის თავიდან აცილება ვერ შეძლო.

მთავრობა ბანკებისთვის ახალი გადასახადის დაწესებას, ასევე ავიაბილეთებსა და ბუნებრივ აირზე გადასახადების ზრდას გეგმავს. ხარჯების შემცირებასთან ერთად, მიზნად ისახავენ 2029 წლისთვის მთავრობის დეფიციტის 9,2 მილიარდი ევროთი (10,6 მილიარდი დოლარი) შემცირებას.

ცენტრალური ბანკის მონაცემებით, მოსალოდნელია, რომ ევროზონის სიდიდით მეექვსე ეკონომიკის საბიუჯეტო დეფიციტი წელს მთლიანი შიდა პროდუქტის (მშპ) 4,5%-ს მიაღწევს, ხოლო ვალი მშპ-ს 104,7% იქნება; ეს მაჩვენებელი კი ევროკავშირის საბიუჯეტო წესებით დაშვებულ მაქსიმუმზე ბევრად მაღალია.