აშშ-ის პრეზიდენტმა დონალდ ტრამპმა განაცხადა, რომ ტაილანდსა და კამბოჯას შორის განახლებული სასაზღვრო შეტაკებების შესაჩერებლად „ერთ სატელეფონო ზარს განახორციელებს“.
პენსილვანიაში გამართულ მიტინგზე სიტყვით გამოსვლისას ტრამპმა აღნიშნა: „უნდა ვთქვა, რომ კამბოჯა-ტაილანდის ინციდენტი დღეს დაიწყო და ხვალ ერთი სატელეფონო ზარის განხორციელება მომიწევს. კიდევ ვის შეუძლია თქვას, რომ „ერთ სატელეფონო ზარს განვახორციელებ და ორ ძალიან ძლიერ ქვეყანას, ტაილანდსა და კამბოჯას შორის ომს შევაჩერებ?“.
მას შემდეგ, რაც მიმდინარე კვირაში შეტაკებები განახლდა, ორივე ქვეყანაში 500 000-ზე მეტი ადამიანი იძულებით გადაადგილდა. განახლებულმა საომარმა მოქმედებებმა დაარღვია სამშვიდობო შეთანხმება, რომელსაც ოქტომბერში კუალა-ლუმპურში, ტრამპის თანდასწრებით მოეწერა ხელი.
მსხვერპლით დასრულებული შეტაკებები ორშაბათს საზღვრის გასწვრივ დაიწყო; ორივე ქვეყნის მთავრობამ ერთმანეთი ივლისში მიღწეული ცეცხლის შეწყვეტის შეთანხმების დარღვევაში დაადანაშაულა.
კამბოჯის ინფორმაციით, ორშაბათიდან მოყოლებული დაიღუპა ცხრა მშვიდობიანი მოქალაქე და დაიჭრა 46 ადამიანი; ტაილანდმა კი განაცხადა, რომ დაიღუპა მათი ოთხი ჯარისკაცი და დაიჭრა 68.
კამბოჯის სენატის პრეზიდენტმა, ჰუნ სენმა განაცხადა: „კამბოჯას მშვიდობა სურს, მაგრამ იძულებულია, საპასუხო ზომები მიიღოს საკუთარი ტერიტორიების დასაცავად“. მან დაამატა, რომ კამბოჯის ძალებს ორშაბათს ცეცხლი არ გაუხსნიათ, თუმცა ღამის განმავლობაში საპასუხო დარტყმა განახორციელეს.
ტაილანდის პრემიერ-მინისტრმა, ანუტინ ჩარნვირაკულმა სამშაბათს განაცხადა, რომ კამბოჯა მოლაპარაკებებისთვის ბანგკოკს არ დაკავშირებია. „ჩვენ უნდა გავაკეთოთ ის, რაც გასაკეთებელია“, — თქვა პრემიერ-მინისტრმა და აღნიშნა, რომ სამხედრო ოპერაციები დაგეგმილისამებრ გაგრძელდება.
ორ ქვეყანას შორის დაძაბულობა ნოემბრიდან დაიწყო, როდესაც ტაილანდელი ჯარისკაცი ნაღმზე დაიჭრა, რომელიც ბანგკოკის მტკიცებით, კამბოჯის ძალებმა დააყენეს, რასაც ფნომპენი უარყოფს.
ტაილანდსა და კამბოჯას შორის უთანხმოება საუკუნოვან დავას ეფუძნება, რომელიც რეგიონში საფრანგეთის კოლონიური მმართველობის დროს გავლებული საზღვრებიდან იღებს სათავეს; ორივე მხარე აცხადებს, რომ საზღვარზე მდებარე ზოგიერთი ტაძარი მათ ტერიტორიას ეკუთვნის.
